Online Reporter
YiNtatheli kaMthunywa
WAKE wezwa ukuthi kuletshukela elingasi tshukela na? Amapholisa eKwekwe abophe abantu abane okubikwa bebethengisa itshukela elingayisilo tshukela.
Kuvele ukuthi amapholisa avusa amehlo ngemva kokunanzelela ukuba itshukela leli lalibhalwe ukuthi lenziwa kuleli yinkamapani ye-Tongaat Huletts kodwa kungasi lakhona.
Abane laba kubikwa basebenzisa ibizo lenkampani yetshukela le ukuze bathengise itshukela labo ngentengo ephezulu. Lokhu, amapholisa athi, yibugebenga obungangcolisa ibizo lenkampani le, ikakhulukazi nxa kungenzakala kube lokungcola thize kulo.
Kubikwa abasolwa laba batholakala belamasaka angu-698 ama-20kg etshukela.
“Kubotshwe abasolwa abane eKwekwe ngemva kokuba amapholisa athumbe igonyethi eyayithwele itshukela elingayisilo le-Huletts elibiza US$14 658.”
Abasolwa uDevine Manzisano (19), uKudzaishe Karimatsanga (18), u-Ashten Rwodzi (40) loRebecca Hando (31), bonke bevela eWaterfalls laseChitungwiza.
Amapholisa abopha laba ngemva kokuncwetshwa indlebe ukuba abane laba bangenisa itshukela engayisiyo eMachingura Wholesale endaweni yamabhizimusi eKwekwe. Ngesikhathi amapholisa efika igonyethi le yayithwele amasaka angu-698 ama-20kg etshukela elingayisilo.
Obona ngokuvikelwa kwempahla yeTongaat Huletts waqinisekisa ukuthi itshukela leli kalenziwanga enkampanini yabo.
Inhlolisiso eyenziweyo iveze ukuthi abane laba bebengelachence elibapha imvumo yokusebenzisa ibizo lenkampani le.
Abane laba badonselwe phambi kwenkundla kamantshi eKwekwe lapho ababhekane lecala lokwephula umthetho weTrademarks Act. Icala labo lidluliselwe kumhlaka 19 Mpalakazi ukuze lizochwayisisa kudingwe bonke abathinteka ekuthengiseni itshukela elingayisilo.
