Online Reporter
Nkosilathi Sibanda
IZAKHAMIZI zeNkulumane koBulawayo sezilethuba lokuthapha ulwazi lokwenelisa ukuxhumana zisebenzisa amagagasi eStar Link, kulandela isipho esivele kukhansila ka-Ward 20 uSandra Ndebele-Sibindi.
UNdebele-Sibindi, odume njalo ngokuba ngumculi, unikeze lesi isipho eNkulumane 12 Library kumalanga ambalwa adluleyo. Ekhuluma ngalokhu kuMasiyephambili Weekly, uNdebele-Sibindi uthe injongo yakhe yikuphakamisa umphakathi walindawo, ikakhulu intsha, ngokusondeza amagagasi okuxhumana lapho okuhlala khona abantu.
Uthe kuzadala ukuthi kube lentuthuko nanko phela sekulula ukuthi abantu bathole loba yini abayifunayo ebulenjini ngendlela ephangisayo, futhi etshiphileyo.
“Inhloso yikuthi sibe lendawo ezile-WiFi lapha ku-Ward 20 ukwenzela ukuthi intsha yethu ithole amagagasi obulembu. Kuzabanceda nxa besenza izifundo lokuthapha ulwazi olungabaphathisa ekusunguleni amabhizimusi,” kutsho uNdebele-Sibindi ebikela ikhansili.
Ubeke isicelo sokuthi ikhansili incedise ngokubhadala indleko zokudonsa amagagasi inyanga ngenyanga.
Kulandela isipho sikaNdebele-Sibindi, umqondisi wezindlu lemisebenzi kazulu ekhansilini yakoBulawayo uMnumzana Dictor Khumalo uthe balethemba lokuthi ukuba khona kwamagagasi obulembu kuzengeza inani labantu abangamalunga ama-library edolobheni.
“Isipho lesi sizaphathisa kakhulu ekuthapheni ulwazi ikakhulu kubantwana abasezikolo. Ukuba khona kwamagagasi e-internet kuzakhweza inani labantu abasebenzisa ama-library ethu, nanko belisiya lisehla kuminyaka edluleyo,” kutsho uMnu Khumalo.
UMnu Khumalo ubonge uKhansila uNdebele-Sibindi, wabika ukuthi ikhansili izimisele ukubhadala indleko ezikhitshwa ngenyanga.
