Online Reporter
YINtatheli kaMthunywa
KULEQEMBU lezigebengu ezine ebesezihluphile ngokuhlukuluza abantu eMasvingo ngokugqekeza lokutshontsha elibotshiweyo.
Isikhulumi selizweni sohlangothi lweCriminal Investigations Department uDetective Inspector Rachel Mutewere ukuqinisekisile lokhu.
Uthe: “Siyabonga kumalunga omphakathi ngolwazi abasiphe lona olusize ukuthi kubotshwe uPeace Mandizvidza (32), Edward Sibanda (27), Tapiwa Tagwirei (27) loKumbulani Sibanda (25).”
UDet Insp Mutewere uthe mhlaka 20 Mabasa, amapholisa eCID Masvingo athola umbiko othinta abasolwa kubugebengu.
Uthe: “Amapholisa aqalise uphenyo oluholele ekubotshweni kukaMandizvidza mhlaka 30 Mabasa, yena owaveza abanye ayesebenzisana labo. UEdward Sibanda wabotshelwa eZvishavane, kwathi uTagwirei loKumbulani Sibanda babotshwa eVictoria Ranch,” kutsho uDet Insp Mutewere.
Abasolwa bebehlose izindlu eziseVictoria Ranch leRunyararo West kusukela ngenyanga kaZibandlela kusiya kuMabasa lonyaka.
UDet Insp Mutewere uthe abasolwa bebegqekeza ezindlini ezingelabantu, bangene bantshontshe impahla zendlini ezigoqela ezamagetsi, izitsha zokupheka kanye lama-solar back-up systems.
Uthe: “Amapholisa athole omabonakude ababili, umaqandisa, i-electric drill, ingubo ezilitshumi lanhlanu, ama-solar panels kunye lama-battery amabili e-lithium.”
Uthe: “Kwesinye isehlakalo esenzakala phakathi kwamhlaka 18 Nhlolanja lo 1 Mbimbitho, iqembu leli lagqekeza latshontsha umabonakude, umaqandisa, i-microwave, ama-battrey amabili e-lithium lama-inverter amabili. Basebenzisa indlela efananayo, bagqekeza kwenye indlu ngoNhlolanja batshontsha umabonakude, i-battrey le-lithium le-inverter.”
Amapholisa adinga ulwazi olungasiza ukuthi kubotshwe njalo uMukudzei Ashton Gwanyanya, ongakabotshwa.
Abasolwa kulindelwe ukuthi bavele emthethwandaba weMasvingo maduze.
