Online Reporter
Sukulwenkosi Dube-Matutu
KULAMADODA ayisithupha eBeitbridge abotshelwe ukutshontsha inkomo okubangele ukuthi kutholwe ubufakazi obubahlanganisa lenkomo ezingu-18 ezitholakale zihlinziwe.
Isikhulumi samapholisa esabelweni seMatabeleland South Inspector Chiratidzo Dube, uqinisekise ngokubotshwa kukaKudakwashe Mabhanda (39), Tatenda Sungano (25), Saviours Chiputso (48), James Chibaya (30), Simon Togara (50), loEzekiel Gwauya (43).
“Mhlaka 26 Ntulikazi 2025 ngehola lika 6 ekuseni, amapholisa eBeitbridge athola udletshana lokuthi kule-Honda Fit emhlophe elenombolo ezingaziwayo eme ezindlini ezikuma New Stands, eBeitbridge, elomtshayeli wesilisa eyethula amabhakede agcwele igazi.
“Abacuphi kanye lamalunga eBeitbridge Urban and Beitbridge Canine aqonda endaweni le, lapho abafika bahlola bathola amabhakede amabili ama-20 litres kunye lebhavu kugcwele inyama endlini yokulala yomunye umsolwa,” kutsho uInsp Dube.
U-Insp Dube ubuye wathi bathola amanye amabhavu amabili egcwele inyama, ingqamu ezimbili, imijibila emithathu kunye lehloka kwenye indlu yokulala.
Kubikwa abetheswacala ababili baveza ukuthi babetshontshe inkomo ezimbili bazihlinza egangeni eliseduze leNaude Quarry site eBeitbridge. Babuye bachaza abanye abane.
U-Insp Dube uthe ukuchwayisisa kwamapholisa kwabuye kwaveza ukuthi abetheswacala laba bathinteka njalo kwamanye amacala amanengi okutshontshwa kwenkomo enzakala eBeitbridge.
Iqembu leli lakhokhela amapholisa baya endaweni eziyisificaminwe mibili lapho okwatholakala ubufakazi bokuthi batshontsha inkomo ezingu-18 bazihlinza.
