Online Reporter
Ethel Ncube
INDUNA yeDongamuzi uMenyezwa usebike ukuba kasoze ahlehlele emuva ekulwisaneni lamacala okutshontshwa kwenkomo esigabeni sakhe.
Induna uMenyezwa ubike ukuba esigabeni sakhe wonke umuntu uselipholisa lomunye njalo zonke izakhamizi zilomlandu wokuba zikhangele ukuba akulazifuyo ezitshontshwayo.
Ikhuluma lentatheli induna uMenyezwa iveze ukuba basebenzisana lamapholisa ekwehliseni amacala okuntshontshwa kwezifuyo.
“Amacala okutshontshwa kwezifuyo abesesanda endaweni yami ikakhulu ezalabo abasemazweni aphetsheya.
“Ngixwayisa izakhamizi ukuba zingabona imota ithwele inkomo loba kusemini zibizane zimise imota zicele ukubona amaphepha enkomo abazithweleyo ukuthi zisuke ngaphi lokuthi ziyangaphi.
“Akulasakhamizi okumele sibone kuthathwa inkomo sithule. Wonke umuntu kumele ancedise ukuze sivikele izifuyo zethu.
“Inkomo yizo umnotho wethu, nxa zingatshontshwa kutsho ukuba siyabe sesisiba mpofu thina sifuyile, lokho akuvumi,” kutsho induna uMenyezwa.
Uqhubekele phambili ebika ukuba nxa bengabamba umuntu etshontshile bamdlulisela kwabomthetho.
“Nxa isela selithe labanjwa silidlulisela emapholiseni lobufakazi bakhona lathi ubufakazi siyasala labo. Siyalandelela emthethwandaba siyebuza ukuba sabophisa umuntu angabe egwetshiwe ugwetshwe iminyaka emingaki. Izakhamizi kumele zibe kwazi konke lokhu ukuze bonke abafuna ukutshontsha besabe.
“Njengezakhamizi zeDongamuzi lezinye izigaba siyazi ukuba singaqhubeka sibambene ekulwisaneni lamacala okutshontshwa kwezifuyo sizanqoba kuphela,” kuphetha uMenyezwa.
