Online Reporter
YiNtatheli kaMthunywa
KULAMADODA amathathu abotshwe eBeitbridge, kulandela ukuthola umzila wokuthi batshontsha imota eSouth Africa bayingenisa ngudlu kuleli ngomfula uLimpopo, esiqintini seTshitulipasi.
Abathathu abathi uBester Moyo, Admit Moyo lo Freddy Mugabe kunye lomunye olokhu engakabanjwa, batshontsha iFord Ranger double cab eBoksburg, eSouth Africa bafika bakhipha ingxenye ezehlukeneyo andubana babotshwe bethengisa i-gear box eBeitbridge.
Kubikwa abetheswacala babuye batshisa imota le egangeni ukuze kungatholakali ubufakazi becala leli.
U-Police Officer Commanding Beitbridge (Dispol), u-Chief Superintendent Melusi Ncube uthe ngoLwesithathu, abathathu laba babotshwa ngosuku lukaZibuse bethengisa impahla abayikhipha emoteni le.
“Abathathu laba sibethesa icala lokutshontsha imota njalo iqula lethu selilitholile igabha lemota le elitshisiweyo kunye lengxenye zemota le ezakhutshwayo ezazithengiswa ngabetheswacala eBeitbridge,” utsho kanje.
“Kumbiko esilawo okwakhathesi, imota le yatshontshwa eBoskburg mhlaka 28 Mbimbitho andubana ingeniswe kuleli ngudlu, emfuleni uLimpopo.
“IsiseZimbabwe, imota le yafihlwa egangeni lapho eyakhitshwa khona ingxenye zayo, zathwalwa ngenqola zayafihlwa. Ngemva kwalokho baqala ukuzithengisa, babotshwa bethengisa i-gear box.”
Uthe uchwayisiso luyaqhubeka njalo amapholisa asebenza nzima ukulwisa amacala adalwa endaweni ezehlukeneyo emfuleni uLimpopo.
UChief Spt Ncube uthe abathathu laba sebeke bamiswa emthethwandaba njalo banikwe ibheyili yeUS$150 belindele ukuthoniswa kwecala labo.
Ukungeniswa ngudlu kwezimota kumngcele, kukhanya sekusanda, okwenza uHulumende alahlekelwe yizigidi zamadola emali zokungenisa impahla etshiyeneyo kuleli.
