Vusumuzi Dube
Nkosilathi Sibanda
OMAMA beTsholotsho sebevumelane ukuthi ngeke bahlalele izandla.
Ngokubambana, sebebone ithuba lokwenza imali ngokusebenzisa isiphiwo sokuthunga amabhasikiti, ingcebethu lezinye izitsha ngamalala langepulasitiki.
Izitsha abazithungayo zithandwa lakwamanye amazwe aphetsheya, okuyikho okubasondeze eduzane le-United
Nations Development Programme (UNDP), esibavulele umkambo wokuthengisa emazweni ase-Europe.
Abesifazane abaseTsholotsho laba, inengi bangaphansi kwenhlanganiso yeNgwenyama Orphans Trust. Amalunga enhlanganiso le abebukisa imisebenzi yawo eZimbabwe International Trade Fair ngeviki edluleyo.
Inhlanganiso le isesiqintini seNgamo, eTsholotsho, esabelweni seMatabeleland North.
Ikhokhelwa ngumqondisi wenhlanganiso uNkosikazi Nomaqhawe Moyo, iNgwenyama Orphans Trust ikhange uzulu lenkokheli zamabhizimusi ezincome umsebenzi wayo, ikakhulu izitsha ezithungwe kusetshenziswa ipulasitiki.
Ukuthunga ngepulasitiki kwenze i-UNDP yasukumela phezulu, yasekela omama beNgwenyama Orphans Trust ngemali lokubavulela amathuba wokuthengisela emazweni ase-Europe lamanye awe-Africa agoqela iKenya, Nigeria, Senegal, Botswana, Zambia leSouth Africa.
Ukusebenzisa ipulasitiki kunconywe ngezinga eliphezulu ngoba kuyindlela yokuhlanza umhlaba lokuvikela ukugugudeka kwawo, kulandelwa izixwayiso lezithembiso eziphawulwe ku-United Nations Sustainable Development Goals (SDGs).
UNkosikazi Nomaqhawe Moyo ukhulume lephephandaba likazulu ngokusebenzelana kwabo le-UNDP.
“Ukubambana kwethu lenhlanganiso ye-UNDP kusiphathise kakhulu ekutholeni indawo lapho esithengisela khona ingcebethu zethu. Sesilabantu abasifakela ucingo silibele, befuna ingcebethu zethu.
“Okwenza umsebenzi wethu ubephezulu yikuthi siqina ngokuthunga sisebenzisa ipulasitiki. Zikhona izitsha zamalala esizithungayo kodwa siphakamisa iTsholotsho basket ethungwe ngepulasitiki,” kutsho uNkkz Moyo.
Uthe kulandela ukusebenza kwabo le-UNDP, sebenelise ukuxhumana labathengi, okuyikho okubavusa emadabukakusa bethunga izitsha.
“Nxa uthole ucingo oluvela eKenya, umuntu esithi ufuna ingcebethu, ngeke ulale. Sifuqwa ngabathengi, sikhuthazwa yi-UNDP ukuthi singahlaleli izandla.
Omama beNgwenyama Orphans Trust bangaphansi kweMatabeleland North Handicraft Cluster njalo esebenzelane leZimTrade kuhlelo lokuthuthukisa amabhizimusi akuleli.
IMatabeland North Handicraft Cluster le ibalisela indawo eziseLupane, Binga, Tsholotsho, Nkayi and Hwange leVictoria Falls.
Kuhambo lwayo leZimTrade, sekuvuleke amathuba emkambo kwamanye amazwe e-Europe, Asia laseMiddle East ngokutsho kukaNkkz Moyo.
UNkkz Moyo uthe inhlanganiso ezinjengeUNDP zenelise ukuthi zikhaliphise ingqondo zamalunga abo.
“Sesiwazi umsebenzi wemali lokuzenzela. Inengi labomama lapha sebekwazi ukwenza ingcebethu bathole imali ezwayo. Kabasavumi ukuqilwa ngoba intengo efaneleyo iyaziwa. I-UNDP ihlala isiba lezifundo zebhajethi, ukugcina imali lokwazi ukuthi isebenza njani.”
Elinye ilunga leNgwenyama Orphans Trust uNkszn Betty Ncube uthe ukuba lilunga lalinhlanganiso kuguqule impilo yakhe.
“Inhloso yethu yikuqoqa imali yokuphilisa imuli zethu. Siyafundisana njengabesifazane kumisebenzi yezandla, sithunga ingcebethu lamabhasikiti lokunye sisebenzisa ipulasitiki, amalala lotshani.”
Online Reporter