admin
Ethel Ncube
AMAPHOLISA eZimbabwe Republic Police esabelweni seNkabazwe asexwayise uzulu ukuba ekele ukwephula imithetho ebekiweyo yokunqanda ukumemetheka kobhubhane lweCovid-19.
Amapholisa esabelweni seMidlands axwayise uzulu ukuthi ekele ukugada izimota zisiya kwamanye amadolobho kulandela ukubotshwa kwezimota ezingu-171.
Isikhulumi samapholisa eNkabazwe, uInspector Emmanuel Mahoko uthe amapholisa akumelanga eluse uzulu kodwa abantu kumele balandele imithetho ebekiweyo.
“Uzulu akumelanga abone angathi ngumlandu wamapholisa ukuthi abone ukuba uvikelekile kumkhuhlane weCovid-19 kodwa kumele balandele imithetho ebekiweyo ukuze bazivikele.
“Omunye umthetho owabekwayo ukuze kulwiswe ukumemetheka kobhubhane lolu yikuba akuvunyelwa ukuhamba umuntu esuka kwelinye idolobho esiya kwelinye kodwa bakhona abawephulayo umthetho lo.
“Sibophe izimota ezifika 171 njalo zisenkambeni yamapholisa eGweru khathesi, abatshayeli bazo labo babotshiwe ngoba besephula umthetho owabekwayo ukuba kungabi lezimota ezithwala abantu okungekho emthethweni,” kuphetha uInsp Mahoko.
Online Reporter