admin
Ethel Ncube
KULOMONGIKAZI wesibhedlela seZvishavane okhothe imbenge yelahle ngolimi ngemva kokubanjwa ethengisa amakhadi aphiwa abantu abahlatshwe ijekiseni yeCovid-19.
Umongikazi lo obizwa ngelokuthi Faith Nyoni osebenza esibhedlela seZvishavane ubanjwe xhaka ethengisela abantu abangahlatshwanga amakhadi la ngemali ebiza US$20 kusiya ku-US$30.
Icala leli livele ngemva kokuba amapholisa ezwe udletshana bathola enye indoda ebizwa ngokuthi Cloud Nyoni okubikwa yiyo ebihamba idinga abafuna ukuthenga amakhadi la.
Amapholisa ahle amhlakaniphela eza kuye ezenza wona afuna ukuthenga amakhadi okubangele ukuthi umsolwa lo abafikise ku Faith Nyoni.
Ekhuluma lentatheli uAssistant Commissioner Paul Nyathi uveze ukuba kuliqiniso ukuthi kulomongikazai lomunye ababotshelwe ukuthengisa amakhadi aphiwa asebahlatshwa ijekiseni yeCovid-19.
“Liqiniso sibophe abantu ababili besetheswa icala lokuthengisela abantu amakhadi abhalwe ukuba bahlatshwa ijekiseni yeCovid-19 bona bengahlatshwanga. Ngithanda ukuxwayisa uzulu ukuba angakwenzi lokhu ngoba kubeka impilo zabantu abanengi engozini. Abantu kabalandele indlela eziqondileyo njalo ezisemthethweni, ofuna ikhadi kahambe ayozivikela ngokuhlatshwa ukuze ubhubhane lweCovid lunqotshwe,” kuphetha uAssistant Commissioner Nyathi.
Online Reporter