Online Reporter
Raymond Jaravaza
KULENDODA eleminyaka engu-31 yokuzalwa ebotshwe ngemva kokusolwa ngokubamba inkunzi abatshayeli bezimota eBellevue koBulawayo.
Indoda le, kutholakale ukuba ithinteka kwamanye amacala ayisikhombisa, okwenza ubugebengu ehlome ngombhobho edolobheni.
Umsolwa lo, uNkosana Maketho, ubemele avele emthethwandaba ngoLwesibili.
Amapholisa eZimbabwe Republic Police (ZRP) athe umsolwa wayezenza umuntu ofuna ukugadiswa imota ngaphambi kokuthi ahlasele abatshayeli.
Kubikwa ukuthi isehlakalo senzakale ngoLwesihlanu ngeviki edluleyo emgwaqweni we-Wellington Road, eBellevue lapho umsolwa amisa khona imota yohlobo lweHonda Fit.
“Kuthe esegadiswe imota le, umsolwa wakhupha umbhobho, wasongela umamangala, efuna imali lezinye impahla eziligugu,” kutsho amapholisa kumbiko wawo.
Ngenxa yokwesabela impilo yakhe, kubikwa umamangala wanika umsolwa i-US$50.
Umetheswacala kubikwa wehla emoteni wangena emasimini omumbu ayeseduzane.
“Umamangala wahle wazisa amalunga omphakathi ukuze badinge umsolwa, ngesikhathi esifanayo wabikela amapholisa. Abacuphi beCID Homicide Bulawayo baphuthuma, okwabangela ukuthi umsolwa abotshwe njalo kwatholakala umbhobho wohlobo lwe-Blow F92 9mm,” kutsho amapholisa.
Uphenyo luveze ukuthi uMaketho uxhunyaniswa lamanye amacala ayisikhombisa wokubamba inkunzi ehlomile koBulawayo.
Kwelinye lamacala la, amapholisa athe mhlaka 19 Mbimbitho 2026, lapho okuhlangana khona imigwaqo kaNketa Drive loMasiyephambili Drive, umsolwa wacela ukugadiswa imota ngaphambi kokuba abambe inkunzi umtshayeli.
Ngolunye usuku, ngehola lika-11 ebusuku, omunye njalo umtshayeli kubikwa ukuthi wabanjwa inkunzi ngendlela efanayo.
Amapholisa aphinde athola omakhalekhukhwini abanengi okukholakala ukuthi batshontshwa ngesikhathi uMaketho ebamba abantu inkunzi.
