Online Reporter
Peter Matika
AMAPHOLISA akoBulawayo abophe indoda eleminyaka engu-35 yokuzalwa ilesaka eliyi-23kg lembanje kulandela ukuncwetshwa indlebe yizakhamizi.
UValentine Bhebhe ovela eLower Gwelo ubotshwe ngoMvulo ekuseni kuyonale iviki elembanje ezilesisindo se-23kg ezibiza imali engange-US$23 500.
Kubikwa amapholisa ohlangothi lwabacuphi amukela umbiko wokuba uBhebhe uzamukela isaka elilembanje kumalayitsha ku-car park elapho okuhlangana khona umgwaqo weLuveve loMasiyephambili.
Amapholisa afika ama bucwadlana kodwa eqaphe lapho ayelayelwe khona asebona abantu ababesamukela impahla zabo kunye loBhebhe laye esethwele isaka elifana xathu lelalichazwe kumbiko ababewamukele.
UMsekeli wesikhulumi samapholisa koBulawayo uAssistant Inspector Thandekile Ndlovu uncome uzulu ngokuqhubeka ebapha imbiko encedisa ukuba kubotshwe izigilamkhuba.
“Sithanda ukubonga uzulu ngokusipha umbiko oqondileyo osincedise ukuba sibophe uValentine Bhebhe elembanje ezilesisindo se-23kg.
“Sifisa njalo ukuxwayisa labo abathengisa izidakamizwa ukuthi kungakhathalekile indlela abazisebenzisayo uhlangothi lwamapholisa lweCID Drugs and Narcotics luzabafinyelela umthetho udlale indima yawo,” kutsho uAsst Insp Ndlovu.
