Online Reporter
Indoda eleminyaka engu-28, eyisizalwane sakuleli kubikwa itholakale ilezitho zomuntu okucatshangelwa ukuthi ngamaphambili ivele emthethwandaba weFrancistown ngoLwesibili.
Indoda le kucatshangelwa ukuba iyinyanga.
Indoda le yabotshwa eShashe Mooke khonale eBotswana ngeSonto.
Ngokutsho kuka-Acting Station Commander weGerald Police Station, uAssistant Superintendent Obakeng Manewe, umsolwa wabotshwa ngemva kokuba amapholisa ethole imbiko mayelana lodaba lolu.
“Kwathi ngemva kokuthola imbiko le, amapholisa aya endaweni le afika aqala ukusetsha.
“Ngesikhathi kusetshwa, indoda edabuka kuleli eleminyaka engu-28 yatholakala ilezitho okusolwa ukuthi yizitho zangasese zowesilisa,” kutsho uAssistant Supt Manewe.
Izitho zomzimba okusolwa ukuthi ngezomuntu sezathathwa zagcinwa njalo zathunyelwa kuForensic Pathologist ukuze kwenziwe olunye uphenyo.
Indoda yeZimbabwe eleminyaka engu-28 ivele phambi komthethwandaba eBotswana isolwa ngokuba lezitho zomzimba okusolwa ukuthi ngezomuntu.
UNyasha Mudzongeri, oyisizalwane seZimbabwe njalo eleminyaka engu-28, uvele phambi komthethwandaba eBotswana ebhekane lecala lokuphatha ngokungekho emthethweni inyama kumbe izitho zomuntu.
UMudzongeri uvele phambi komthethwandaba weFrancistown ngoLwesibili, mhlaka 15 Mpandula 2026, ngokutsho kweBotswana Police Service.
UMudzongeri ubhekane lamacala amabili ngemva kokubotshwa eduze kweShashe Mooke Village ngeSonto, mhlaka 13 kuMpandula.
Icala lokuqala lihambelana lezinsolo zokuthi wangena elizweni le Botswana okungekho emthethweni, engelawo amaphepha okuhamba.
Uphinda esolwa ngokuba lenyama kumbe izitho zomuntu okungekho emthethweni.
Amapholisa eBotswana kawazange anikeze eminye imininingwane ngezimo ezihambelana lokusolwa kokuba lezitho lezi ekukhululweni kwawo kwangemuva kwabezindaba.
Amapholisa athi izitho ezatholakala ngesikhathi kuphenywa udaba lolu sezithunyelwe elabhorethori ye-Forensic Science Services yeBotswana Police Service.
Izinto lezi zizahlolwa kabanzi kusetshenziswa ubuchwephetshe be-forensics kanye lezesayensi, njengoba abaphenyi bezama ukuthola ukuthi zavela ngaphi lokuthi zilobunye ubufakazi obungasetshenziswa yini ekuphenyweni kwaleli cala.
Lokhu kutsho ukuthi ubunjalo kanye lemvelaphi yezitho okusolwa ukuthi ngezabantu akukatholakali ngokusemthethweni ngokuhlolwa kwe-forensic.
Ngemva kokuvela kwakhe phambi komthethwandaba, uMudzongeri ubuyiselwe ejele.
Kukhangelelwe ukuthi aphinde avele phambi komthethwandaba mhlaka 18 kuMpandula 2026.
IBotswana Police Service ithe uphenyo ngaloludaba lusaqhubeka njalo ikhuthaza uzulu ukuthi angabelani, angathumeli kwabanye okungaqinisekiswanga mayelana laleli cala.
Amapholisa aphinde akhuthaza uzulu ukuthi athembele ezazisweni ezisemthethweni ezivela eBotswana Police Service kanye lezinye iziphathamandla ezifaneleyo, exwayisa ngokuthi ukwabiwa kolwazi olungamanga kungaphazamisa uphenyo kanye lokusebenza komthetho.
– Ubulembu
