Online Reporter
Yintatheli kaMthunywa
IMULI yakoMoyo eNyathi kuVillage 4, esabelweni seMatabeleland North idinga abantu ababulala elinye ilunga lemuli yabo ngeviki ephelileyo babuye batshontsha inhlabathi elegazi likamuyi.
UGift Moyo wedlule emhlabeni ngeviki ephelileyo ngemva kokuhlaselwa ngabantu ebusuku evela ezitolo, ngokuswelakala kwenhlanhla waphela endleleni engakafiki esibhedlela.
Ngemva kokugwazwa kukamuyi, abakibo bathi befika bathola inhlabathi eyayilegazi likamuyi isibuthiwe kodwa akwazakali umuntu owayibuthayo.
Intatheli ixhumane lelinye ilunga lemuli elale ukuqanjwa ngebizo elibike ukuba bazwa ubuhlungu ngokutshona kukaGift.
“Kubuhlungu ukuba semukele ukuba uGift kasekho emhlabeni kodwa sizathini sesimbekile kodwa akudlulanga kithi kusabuhlungu.
UGift kumele avuke azilwele. Simtshelile esebhokisini sathi kuye kavuke azilwele. Abantu abambulalayo umkhondo uyazwakala kodwa ubufakazi bakhona asikabutholisisi kuhle,” kubika owemuli.
Ubuye waveza ukuba ngesikhathi bethatha uGift bathola kulesiga esithile.
“Ngesikhathi kuthiwa uGift ulele emgwaqweni usegwaziwe sagijimela khona safika sakhanyisa samthola esaphila kodwa esesimeni esibi engasakhulumi.
Sadinga ukuba sibone lapho okuchithekele khona igazi lakhe sathola inhlabathi ibuthiwe okutsho ukuba omabulala bahle bayithatha mhlawumbe ngenhloso yokuyasebenzisa igazi lakhe ukuba icala lingaveli.
“Siyafunga njengabantu bakoMoyo sithi loba kutheni ngeke owethu alale nje athule bazaphela abantu njalo legazi lakhe nxa kuyikuthi bacabanga ukuliphendukisa sebephuzile sithi owethu kalali uzakulwa sithule nje.
“Asivumi into enjalo emulini yethu akuqalwa lokho bangaze babhode enyangeni enjani. Sicela uzulu ongabe elolwazi ngabantu ababulala umfowethu abhale incwadi ajikele ebhokisini lamapholisa babotshwe thina siyakuma ngesintu sethu babulele ongayisuye nxa bejwayele ukubulala,” kuphetha owemuli.
