Online Reporter
Ethel Ncube
KULAMADODA amane adingwa ngamapholisa eGokwe ngoba esolwa ngecala lokutshaya umuntu baphinda bamlandela bayambulala.
UNelson Silemba oleminyaka engu-47 ubulewe ngamadoda amane kumbango wesikhwili esadlulayo esatshiya umuyi equnywe umunwe, ngemva kwezinyanga bamlandela futhi bayamtshaya bambulala.
Kubikwa ukuba uSilemba watshaywa ngamadoda la amane ngoNcwabakazi kuwonalo umnyaka bamtshiya elimele waqunywa umunwe, bahlawuliswa inkomo ezimbili umuntu lomuntu, zaphiwa yena uSilemba.
Inkomo lezi zathathwa kumadoda la bona abanikazi bengekho emzini yabo zaphiwa umamangala.
NgoLwezi, amadoda la alandela uSilemba afika amgamula ngehloka lamabhemba, abanye bamgwaza ngengqamu bamtshiya esesimeni esibi. USilemba wathwalelwa esibhedlela kodwa ngokuswelakala kwenhlanhla, wedlula emhlabeni engakafiki esibhedlela. Ometheswacala abane laba badingwa ngamapholisa.
Intatheli ixhumane lesikhulumi samapholisa eMidlands u-Inspector Emmanuel Mahoko, obike ukuba amapholisa adinga abetheswacala laba.
“Sicela uzulu asincedise ngokudinga amadoda la abalisa uBlessed Gwinya, Wuzu Moyo, Munashe Makore loLoyal Mpofu abasolelwa icala lokubulala. Ongabe elolwazi lwalapho abakhona kazise amapholisa aseduzane laye ukuze izigelekeqe lezi zibotshwe,” kutsho uInsp Mahoko.
