Online Reporter
Nkosilathi Sibanda
KULEMULI ephakathi kosizi olukhulu kulandela ukunyamalala kosane olulenyanga ezine zokuzalwa elokitshini leNjube koBulawayo.
Unina womntwana uMitchel Mpofu, ekhuluma kumbiko wakhe enkundleni zeSocial Media, uthe wayevakatshele unina omncane eNjube, endlini kuF271, ngeviki edluleyo.
Usane olunyamaleleyo nguBrendon Nyoni, ozalwa nguMitchel loBrian Nyoni abeNtabazinduna, eMatabeleland North.
Uthe ngoMvulo kwafika owesifazane othile okuthiwa wayecelelwe ukuzofihla ikhanda ngomunye owesilisa okuthiwa nguWelcome, osebenza eNtumbane Complex. Kuthiwa owesifazane lo, okubikwa ukuthi isibongo sakhe ngesakoMahlangu, wahlangana loWelcome emgwaqweni njalo babengazani ngaphambilini.
Ngokutsho kukaMpofu, uWelcome kuthiwa wacelela owesifazane indawo yokuhlala okwesikhatshana ethembisa ukuthi uzamlanda ntambama eseqedile emsebenzini.
Kubikwa ukuthi ntambama owesifazane lo waseyenathe utshwala kakhulu, kwathi uWelcome wamfica edakiwe wasehamba, wamtshiya lapho.
NgoLwesibili ekuseni, owesifazane lo kuthiwa waphuma lomntwana esithi uyathenga ukudla. Ngokulandisa kukanina womntwana, owesifazane lo wabuyela endlini kodwa waphinda waphuma.
Kusukela ngalesosikhathi, umntwana kasabonakalanga njalo imuli yakhe isikhathazekile.
Imuli isinxuse loba ngubani ololwazi mayelana ngomntwana loba lapho angabe ekhona ukuthi axhumane lamapholisa aseduzane kumbe amalunga emuli.
“Silokhe sidinga usane lwethu njalo sicela uzulu asiphathise ngokwabelana ngolwazi olunganceda ekutholeni umntwana,” kutsho umama womntwana emlayezweni osusabalale ezinkundleni zokuxhumana.
Intatheli yephephandaba likazulu ixhumane lobabakazi wosane, uMusa Moyo obike ukuba balokhe besadinga umntwana.
Ulandise wathi baswele lapho abangayakhona ngesehlakalo lesi. Uthe bamangala udaba emapholiseni eNjube njalo basalinde umbiko wabo mayelana ngophenyo olwenziwayo.
Ngesikhathi sokulotshwa kwendaba le, amapholisa koBulawayo abengakakhuphi umbiko osemthethweni mayelana lokunyamalala kosane.
