Online Reporter
Nkosilathi Sibanda
INHLANGANISO yeMatabeleland North Basketball League isitshayele ihlombe iMosi-oa-Tunya High leSt James High School ngemva kokuthola izicoco zeNational Association of Secondary School Heads (NASH) Matabeleland North Under-20 Basketball Championships zomnyaka ka-2026.
IMosi oa Tunya High ibe yintshantshu kuhlangothi lwabafana kuthi iSt James ibe yintshantshu kwabesifazane.
Imiqhudelwano yesabelo seMatabeleland North yenzelwe eTsholotsho High School ngeviki edluleyo. I-Mosi-oa-Tunya High ithethe isicoco ngemva kokunqoba iNyathi High nge 13-10 emdlalweni wokucina. ISt James High yanqoba iDavid Livingstone.
Izikolo zombili zizamela iMatabeleland North kumncintiswano wezabelo.
Umgcinisihlalo weMatabeleland North Basketball League, uBrighton Musaidzi, uncome amaqembu anqobileyo lazo zonke izikolo ezincintisileyo, waphinda wabonga iTsholotsho High School ngokuphatha kuhle lumqhudelwano lokwamukela umdlalo we-basketball enhlelweni zayo zemidlalo.
“IMatabeleland North Basketball League, ithanda ukuhalalisela iMosi-oa-Tunya High School leSt James ngokuthatha izicoco zeNASH Matabeleland North Under-20 Basketball Championships zika-2026. Lokhu kuyimpumelelo enkulu etshengisa ukusebenza nzima, ukuzimisela lokuzithoba okutshengiswe ngabadlali labaqeqetshi babo,” kutsho uMusaidzi.
“Siyathokoza njalo ukubona iTsholotsho High School isifake i-basketball phakathi kwemidlalo yayo njalo iphathe kuhle umncintiswano ngendlela ehlelekileyo.”
UMusaidzi uthe umncintiswano utshengise ukuthi kulethalenta elinengi eMatabeleland North njalo wagcizelela ukuthi imidlalo yezikolo iqhubeka idlala indima eqakathekileyo ekubumbeni impilo yabantwana.
“Izinga lokuncintisana, ukuziphatha kuhle lentshukuntshu etshengiswe yizikolo zonke iyakhuthaza.
“Sikhuthaza izikolo ukuthi ziqhubeke zibeka imali emdlalweni ngoba unika abafundi amathuba okufunda ukusebenza ndawonye, ubukhokheli kanye lokuziphatha kuhle,” kutsho uMusaidzi.
