Online Reporter
Brandon Moyo
IMIDLALO ye Archer Clothing Rugby League ifika emaphethelweni ngempelaviki lapho okuzadlala khona iOld Miltonians leMatabeleland Warriors enkundleni yeHartsfield.
Lokhu kuza ngemva kokuba amaqembu womabili ephumelele kumidlalo edluleyo. Intshantshu zanyakenye, iOMs, ithole ukunqoba kanzima nge 27-13 isehlula iMahogany Bulls, kwathi amaWarriors ehlula iWestern Suburbs Panthers nge 36-5.
Njengoba iOMs lamaWarriors zisiya ku-final, iPanthers leBulls zizalwela indawo yesithathu, kumdlalo othembisa ukuthi uzathokozisa.
Ekhuluma ngemva komdlalo umqeqetshi we-OMs uParadzai Matsika uthe uyajabula ngendlela ezakhe ezidlale ngayo.
UMatsika uthe okwakhathesi useqinela amalungiselelo abo omdlalo we-final.
“Njengoba sikhangelele umdlalo ozayo, sibonga ukuthi asilabo abalimeleyo, ngakho siyangena leqembu eliqinileyo, okuyinto enhle. Sidinga ukuthi siye esiqongweni, silungise izinto ezimbalwa,” kutsho uMatsika.
Umqeqetshi wamaWarriors uGilbert Nyamutsamba uthe labo bakhangelele umdlalo omuhle.
“Sidlale kuhle njalo sesigxile kumdlalo wokucina. Abafana benze kuhle. Silindele ukuba lomdlalo omuhle le-OMs,” kutsho uNyamutsamba.
Kweminye imidlalo yenkezo yabesilisa edlalwe ngoMgqibelo, iHighlanders inqobe iBulldogs ngama 27-17.
Emqhudelwaneni wabesifazane, omunye umdlalo othokozisayo ulindelwe kuWarriors Ladies lePanthers. IWarriors Ladies izibekisele indawo ku-final ngemva kokunqoba iBulldogs nge 17-0. IPanthers inqobe iHighlanders 10-5.
I-Highlanders leBulldogs sezizalwela indawo yesithathu ngoMgqibelo.
