Online Reporter
Nkosilathi Sibanda loFungai Muderere
KULO mbuzo odida ingqondo zabalandeli bomdlalo webhola kuleli: ngubani ozaphiwa umsebenzi wokuqeqetsha iqembu lelizwe, amaWarriors?
Ngumbuzo ongaphendulwa loba ngubani olandela inguqu kuleli ngoba wonke umlandeli ulembono lelungelo lokutsho izifiso zakhe, nanko phela lo ngumdlalo wabantu, othandwa ngabanengi.
Kubo bonke abalandeli bebhola, akusilo udaba lomqeqetshi kuphela. Ngumuntu ozaphiwa umsebenzi wokuphatha ithemba lelizwe, akhe iqembu elizakholelwa kulo, njalo alikhokhele esikhathini esinzima.
I-ZIFA isiqalile umsebenzi wokudinga umqeqetshi ozahlala esikhundleni ngokugcweleyo, kulandela ukususwa kukaMarian Marinica ngoMabasa ngemva kwesikhathi esifitshane ephethe amaWarriors. Okwakhathesi, iqembu likhokhelwa nguKaitano Tembo njengomqeqetshi okwesikhatshana.
Kodwa, njengoba uTembo eqhubeka ngomsebenzi, umbuzo uya uqina: I-Zifa izathembela kuye kumbe izaletha omunye?
Kubikwa ukuthi iZIFA isikhangele abaqeqetshi abavela emazweni atshiyeneyo, phakathi kwabo kulabantu abalolwazi olubanzi emdlalweni webhola.KuloTom Saintfiet oweBelgium, Milutin
“Micho” Sredojević (Serbia), Ramon Catala (Spain), Torsten Spittler (Germany), Luis Goncalves (Portugal) loMohamed Fathi (Egypt).
Kodwa, phakathi kwamabizo la, kulenzalo yakuleli, uKaitano Tembo.
UTembo uyalazi ibhola lakuleli, uyazi amaWarriors njalo uyazi lengcindezi ehamba lomsebenzi wokukhokhela iqembu lesizwe. Lokho kungamnika ithuba elithile. Kodwa njalo, ukuqhubeka kwakhe kuzagxila kulokho iZIFA ekufunayo kumqeqetshi wayo omutsha.
Iqiniso yikuthi amaWarriors adinga okwedlula umqeqetshi olephepha elihle lokusebenza.
Iqembu lidinga umuntu ozakha isithunzi lokuzethemba. Umqeqetshi ozenelisa ukuhlanganisa abadlali abaleminyaka etshiyeneyo, abavela kumaqembu atshiyeneyo, abanye bedlala phandle kwelizwe, abanye besekhaya. Uzakuba lomsebenzi wokuthola indlela yokwenza amaWarriors adlale ibhola elizakholwa ngabalandeli, kodwa okubaluleke kakhulu, ibhola elizalethela ilizwe impumela.
Njengoba i-AFCON 2027 Qualifiers isisondela, isikhathi iZifa kumele iphume lesinqumo masinyane. Ukhetho lomqeqetshi kumele lube yisinqumo esibhekiswe phambili, hatshi nje ukuzama ukuvala isikhala esisele ngemva kokusuka kukaMarinica.
Abalandeli bamaWarriors sebedlule ezikhathini ezinengi zokungazi ukuthi ngubani ozakuba ngumqeqetshi olandelayo.
Njalo lapho umqeqetshi omutsha engena, kubuya ithemba elitsha. Kodwa nxa impumela ingekho, ithemba lelo liphenduka ukukhathazeka, ingxoxo iphinde iqale phansi.
Yikho-ke kulokhu, iZifa kumele ikhaliphe.
Ngubani ozaphatha intambo?
Kungaba ngumqeqetshi wakwamanye amazwe ozaletha inguquko? Kungaba nguKaitano Tembo ozathola ithuba lokuqhubeka ngomsebenzi awuqalileyo? Kumbe iZifa izasethusa ngebizo elingakakhulunywa kakhulu?
Impendulo isezandleni zeZifa.
Kodwa, okucacileyo yikuthi amaWarriors kawalindelanga nje umqeqetshi. Alinde umkhokheli ozabuyisela ithemba ebholeni likanobhutshuzwayo elizweni.
Kubalandeli, sekungesinye isikhathi sokukhathazeka: ngubani ozakhokhela amaWarriors empini elandelayo?
