Online Reporter
Ethel Ncube
KULEMULI yakoBulawayo edideke ingqondo ngokungabonakali kwendodakazi yayo eleminyaka engu-17 efunda esikolo seTownsend Girls High koBulawayo.
UThandiwe Moyo oleminyaka engu-17, ofunda uForm 4, uselenyanga engabonakali njalo akukezwakali lomkhondo wokuthi ungaphi.
UThandiwe kubikwa wasuka ngakibo mhlaka 20 Mpandula 2025 esiya esikolo njalo kazange aphenduke.
Imuli idinga usizo lokuthi ithole indodakazi yayo nanko phela labangane bayo abakaze bakhulumisane laye lokhe wacatshayo.
Intatheli ixhumane lonina kaThandiwe, uNanzelela Ncube oveze ukuba kabuquthi ubuthongo ngomntanakhe ongabonakaliyo.
“UThandiwe wasuka esiya esikolo mhlaka 20 Mpandula kuze kufike lamuhla kakaphenduki. Sesamdinga kubangane bakhe bonke akula othi wambona.
“Ubefunda eTownsend ngesikhathi ecatsha. Kangilali ebusuku ngicabanga ukuthi umntanami ungaphi? Sicela usizo ongabe embonile bakwethu asixhume kunombolo ezilandelayo 0777 129 076 kumbe ku-0778678043. kumbe abikele amapholisa aseduzane laye,” kutsho unina kaThandiwe.
