Online Reporter
Lovemore Dube
IDOLOBHO leVictoria Falls lizaba lomdlalo omkhulu we-footgolf, ozadibanisa amazwe.
Kunxuswe umongameli wenhlanganiso ephethe lumdlalo umhlaba wonke, uAleks Kravanja, oweSlovenia, okhangelelwe ukufika kuleli ngoLwesine.
Umdlalo we-footgolf usasemutsha kuleli. Udlalwa kunkundla ze-golf.
Onguye ozibambileyo kulumdlalo kuleli uDaniel Kuwengwa ubike ukuthi balokuthokoza ukwethekelelwa ngumongameli wabo.
UKravanja uzabe elapha phose okweviki njalo efika ngoLwesine uzakwehlela eHarare lapho okukhangelelwe ukuthi uzabonana lengatsha zikaHulumende.
“Siyathokoza kakhulu ukuthi sizekwethekelelwa nguAleks Kravanja okweviki. Uzabe eseHarare mhlaka 20 Lwezi lapho azabonana lengatsha zikaHulumende,” kutsho uKuwengwa.
Uhambo lwakhe lungaphansi kwemizamo yokuthuthukisa umdlalo lo lokwethekelela okuhambelana lemidlalo abakuthi yi-sports tourism.
Kukhangelelwe njalo ukuthi abelomhlangano loSomlomo wePhalamende uJacob Mudenda.
“Uzabona lemizamo yokuphakamisa lumdlalo eSt John’s Retreat Primary School, abuye njalo avakatshele ezinye indawo ezilenkundla yomdlalo,” kutsho uKuwengwa.
UKuwengwa uthe bazizwa behlonitshiwe ngokuza kuka Kravanja njalo bakhangelele ukuqiniswa kobungane.
Ngemva kwemidlalo yeVictoria Falls, iZimbabwe ikhangelele ukuthi ngo2023 ibeyiyo ezaphatha imidlalo yeFootgolf World Cup.
