Online Reporter
Kimberley Chitambara loDalyn Chigwizura
KUSEHLAKALO esisemlonyeni yabantu esigabeni seBubi, eMatabeland North, kudutshulwe amadoda amabili, kwafa eyodwa eduzane leDGL5 Mine.
Owedlule emhlabeni nguThabo Ngwenya, obeleminyaka engu-31. Kubikwa udutshulwe kathathu esifubeni ngunogada wakulumgodi.
Bobabili laba badutshulwe ngoba bebesedlula phambili kweDGL5 Mine, omunye ubethunywe ezitolo ngunina njalo udutshulwe esandleni sokudla.
Abafakazi abaqotho batshele intatheli zeZimpapers ukuthi umnikazi womgodi weDGL5 kafuni muntu odlula eduzane lomgodi lo. Kubikwa akusikho kwakuqala kusiba lesehlakalo esinje.
Amapholisa athe efika ukuzothatha isidumbu sikamufi, kulavuke umsindo wathi phothololo, abantu bavimba ukuthi sithathwe ngoba besithi nxa singasuswa, lelicala kaliyindawo.
Inengi labantu laba yizimbamgodi.
Batshise amavili egedini lomgodi lo, bajikijela amatshe kumafasitela ehofisi.
Ngemva kwesikhathi, izimbamgodi lezi senelise ukungena phakathi. Baphakamise ibhokisi lesidumbu balitshiya phambili kwehofisi yabonogada. Amapholisa acine etshiya isidumbu ezandleni zezakhamizi kunye labonogada.
