Kufa 1, kugwazwe 3 ebhawa ngokutshaya ingoma zokholo

YiNtatheli kaMthunywa

UKUXABANA kubangwa ukutshaya ingoma yokholo ebhawa kubangele ukuthi enye indoda ivuke ubhova igwaze abane, oyedwa wafa.
Abathathu basesibhedlela, okugoqela lomnikazi webhawa eseSolomio Park.
UTendai Mubiya oleminyaka engu-30 ufe ngemva kokugwazwa entanyeni nguTrymore Ndebele, 35.
Umnikazi webhawa, uLuckmore Kazingizi, oleminyaka engu-28, ube lenxeba elitshonayo esifubeni esandleni senxele, kwathi umngane wakhe, uCollen Tomu, oleminyaka engu-30, ugwazwe emhlane.
Kubikwa uTrymore wayelomngane wakhe uPeace Dube oleminyaka engu-25.

Abalimalayo bagijinyiselwa esibhedlela seParirenyatwa, lapho abelatshwa khona.
Ngokutsho komunye owabona ngamehlo, uTendai wayenatha utshwala njalo edlala i-snooker loTrymore loPeace eShooters Bottle Store.
UTrymore loPeace bathenga amathokheni abo balinda ithuba labo lokudlala.
Obone ngamehlo uthe abantu ababesebhawa babelokhu besola othengisa lapho uBrenda, ngokutshaya ingoma zokholo kuphela. Bethi bafuna omunye umhlobo wengoma.

Kubikwa uTrymore loPeace, ababetshaya ingoma efonini yabo, basusa kuBluetooth baphuma phandle kwebhawa.
Ufakazi uthe ababili laba bebuyela ebhawa, bafica kuxabana abantu abane.
Ngesikhathi bexabana, uTrymore wakhipha ingqamu wagwaza uTendai entanyeni.
Ababenatha kuleyobhawa benelisa ukubabamba.
“UTrymore loPeace babotshwa,” kutsho ufakazi lo.
Umphathi webhawa, uFaith Kabasa, uthe uKazingizi loTomu lokhu besesibhedlela.