Online Reporter
Ethel Ncube
ZISELE zididekile izakhamizi zeMashava eMasvingo kusifa abantwana ababili, kwathi abanye abangu-14 balaliswa esibhedlela kulandela ukudla itshefu kumkhosi wesintu wemuli.
NgoMvulo kuyonale iviki kubikwa kwahlangana amalunga emuli ejabula endawonye kwasekudliwa isitshwala kwanathwa lamahewu kumkhosi lowo. Ngokucwayiza kweso umcimbi owawujatshulelwe ngabantu waphenduka waba ngumkhosi abantu sebekhala ngezisu.
Kubikwa ukuthi abalwela impilo esibhedlela abayisikhombisa ngabantu abadala, abane ngabantwana kuthi abanye abathathu sebekhutshiwe.
Isikhulumi samapholisa elizweni uCommissioner Paul Nyathi uqinisekise ngesehlakalo lesi kunkundla ye X.
“Ngemva kokudla isitshwala kunye lokunatha amahewu, ababelapho baqala ukubulawa yizisu. Ngokusweleka kwenhlanhla abantwana ababili oleminyaka emithathu loleminyaka eyisikhombisa bahle bafa.
Abantu abangu-14, okugoqela abayisikhombisa abadala, labantwana abane basesimeni esibi njalo bayelatshwa esibhedlela seMasvingo General Hospital kunye leMashava Clinic.
Abakhokheli lokhe besachwayisisa ngetshefu le. Amapholisa akhuthaza uzulu ukuthi atshiye umkhuba wokudla ukudla kunye lokunathwayo kwesintu okulungiswe ngendlela abangaziqondisisiyo. Ukuchwayisiswa ngodaba lolu lokhe kusaqhubeka.
