marble nkomo
Sikhumbuzo Moyo
INANI labantu abedlule emhlabeni ngenxa yengozi ezibangelwa yikuna kwezulu selifike ku-123 kusukela ngenyanga kaMfumfu nyakenye, ngokutsho kwabeCivil Protection Unit (CPU).
Kubikwa njalo ukuba imuli ezedlula-8 000 sezithinteke kungozi ezitshiyeneyo kusukela kwaqala ukuna izulu elizweni. Izikolo ezingu-147 esabelweni seMatabeleland North zabhidlizwa phakathi kwezingu-237 elizweni lonke.
Isabelo seManicaland yiso esihlaselwe kakhulu nanko sekufe abantu abangu-36, kuthi eMashonaland West sekwedlule emhlabeni abangu-22.
Abe-CPU babika njalo ukuthi mhlaka 15 Nhlolanja 2026, kulomtshova obuthwele abantu abalitshumi lambili othethwe ngamanzi ngesikhathi uzama ukuchapha umfula uMuchavhutwi River, kuWard 17, eJerera, esabelweni seMasvingo.
“Kubikwa amanzi kazange angene emoteni kodwa bekudingeka ukuthi kube losizo ngokuphangisa. Amalunga eDistrict Civil Protection Committee agijime endaweni le, ancedisa abantu abangu-12 kakuhle,” kubika umbiko weCPU.
Mhlaka 14 Nhlolanja 2026 kulezulu lesiphepho elibhidlize izindlu ezedlula amatshumi amabili, kuWard 27 ngaphansi kwenduna uChingoma, esabelweni seMidlands.
“Kube lesinye isehlakalo njalo mhlaka 14 Nhlolanja 2026 ngesikhathi lapho umbane otshaye khona esiqintini seNyamponda-Muzenda ngaphansi kwenduna uChireya, eGokwe North, eMidlands. Kufe abantwana ababili, omunye ulimele kakhulu,” kubika iCPU.
Online Reporter