Kufa usane olulenyanga 4 kusilwa abazali

The gang had been targeting Econet Wireless Zimbabwe’s telecommunication boosters on the outskirts of towns, stealing diesel meant to power generators and solar batteries

Ethel Ncube

KUSINDABAPHENDULI yendaba eyenzakale esiqintini seDomboshava, eMberengwa, kulemuli ebisilwa umama ebelethe usane olulenyanga ezine, ngokusweleka kwenhlanhla imbeleko yakhululeka usane lwawela phansi lwahle lwedlula emhlabeni, ngeviki ephelileyo.

UMthandazo Zhou ubesilwa lonkosikazi wakhe uTawananyasha Zhou oleminyaka engu-18 ebelethe usane lwakhe, uMitchelle Zhou olenyanga ezine, watshelela emhlane wawa wahle wafela khonapho.
Kuvele ukuba kwaba lokungazwani emulini le ngesizatho esingatholakalanga okwadala ukuba ababili laba bacine besilwa.

Ngesikhathi besilwa unina womntwana wayelubelethile, kodwa imbeleko yakhululeka okwabangela ukuba usane luwele phansi lwahle lwedlula emhlabeni.

Amapholisa ancwetshwa indlebe ngendaba le, ayachwayisisa bafica abemuli sebelungiselela ukuba usane lungcwatshwe kodwa kuyindaba efihlwayo.

Intatheli ixhumane lesikhulumi samapholisa eMidlands uInspector Emmanuel Mahoko obike ukuba indaba enjalo isezandleni zamapholisa.

“Amapholisa asebophe uTawananyasha Zhou loMthandazo Zhou abazali bakamuyi uMitchelle, bancedisa amapholisa ngokuchwayisisa ngodaba lokufa komntanabo.

“Sicela uzulu agcine ukuthula ebudlelwaneni babo njalo nxa kuthe kwaba lengxabano bayilungisise ngokukhulumisana kungela kulwa,” kutsho uInsp Mahoko.