Online Reporter
YiNtatheli kaMthunywa
AMAPHOLISA asebike ukuba kulabantu abangu-37 abalahlekelwe zimpilo zabo kuleli kulandela ukutshaywa zimota beseqa imigwaqo ngenxa yokuhamba befake ama-earphones.
Kubikwa abantu laba batshaywe zimota kusukela mhlaka 15 kusiya ku 26 Mpalakazi.
Kumbiko wesikhulumi samapholisa elizweni uCommissioner Paul Nyathi uthe kulabantu abangu-37 abatshaywe zimota besebenzisa omakhalekhukhini njalo abanye befake ama-earphones endlebeni.
“Inani labantu abahamba ngenyawo abatshaywe zimota bafa ngesikhathi sekhefu liyethusa. Kube labantu abahamba ngenyawo abangu-37 abalahlekelwe zimpilo zabo.
“Kuyadanisa ukuthi abanye batshaywe zimota ngenxa yokuhamba emgwaqeni befake ama-earphones endlebeni belalele ingoma,” kutsho uCommissioner Nyathi.
Mayelana lengozi ezibekhona phakathi kwekhefu likaMpalakazi lonyaka, amapholisa athe kube lokwanda okumangalisayo kwengozi zemigwaqo, nanko kubikwa sekufe abantu abangu-100 kusukela mhlaka 15 kusiyafika umhlaka 26.
“Phakathi kwengozi lezi, ezilitshumi zidalwe ngabatshayeli bezimota, ezine ngabatshayeli bemidududu, ezintathu ngabatshayeli bamabhayisikili ezinye ngabezinqola,” kuveza umbiko wamapholisa lo.
Amapholisa athe kube lezehlakalo ezingu-2 412 zokutshayana kwezimota.
Izibalo zengozi zalonyaka zedlule ezanyakenye lapho okwaba lesilinganiso se-1 211 sokutshayana kwezimota, kwedlula emhlabeni abantu abangu-77. Lonyaka kubikwa kulimele abantu abangu-471 kuthi ngo-2024 kwalimala abangu-401.
Ingozi embi kakhulu yenzakala mhlaka 17 Mpalakazi eSuswe, ku-185 kilometre peg emgwaqweni oweHarare–Nyamapanda, lapho imota yeHonda Fit eyayithwele abantu abalitshumi (10) eyatshayana legonyethi elalisiya eHarare. Bonke abalitshumi ababegade iHonda Fit bafa.
Uphenyo ngengozi lezi selukhiphe ubufakazi bokuthi zabangelwa yikungaziphathi kuhle kwabatshayeli lokungagcinwa kuhle kwezimota. Ukutshayela ebusuku lakho ngokunye kwembangela.
Amapholisa ananzelele njalo ukuthi okunye okuhamba phambili ekudaleni ingozi yikudubuka kwamavili, ikakhulu kumitshova yohlobo lwe-Toyota Hiace.
Ukugcwalisa abantu okwedlulisileyo emabhasini ngokunye.
Amapholisa acele abatshayeli ukuthi balandele imithetho yokutshayela ngekhefu lokwamukela umnyaka omutsha.
Abahamba ngenyawo bacetshiswe ukuthi baqaphele, benqabele ukweqa imigwaqo ngendlela engafanelanga.
