Online Reporter
YiNtatheli kaMthunywa
KULEMULI — ubaba, umama kunye lomntanabo — abafa bonke kungozi yebhasi eyenzakala eMakhado, eSouth Africa mhlaka 12 Mfumfu.
Kungozi le, yebhasi yeDNC kwafa abantu abangu-44 kuviki ephelileyo.
Izimuli ezidabukileyo zibuye zathunukala ngamandla ngoMvulo sezibona izidumbu zezihlobo zazo.
Kuvele ukuba kulemuli esakhulayo eyatshabalala kungozi yebhasi le.
ULiveon Maidza, obesebenza kweleSouth Africa, ubezovakatsha ekhaya lonkosikazi wakhe kunye lengane yabo. Bonke bafa kungozi le.
Imuli le kukhangelelwe ukuba iyebekwa eMataga, eMberengwa.
Kungozi le kwafa izizalwane zakuleli ezingu-36.
Usuku lwangoMvulo lwaba buhlungu kakhulu emotsha yesibhedlela seSiloam Hospital lapho izihlobo okwakumele zitsho ukuba izihlobo zazo yiziphi.
Ingcitshi kwezokuhlola zeSouth Africa lazo zenza umsebenzi omkhulu impelaviki yonke ukuze izihlobo zenelise ukukhangela izihlobo zazo.
Kungozi le, eyenzakala kuN1 duzane leMakhado ngeSonto, kuviki ephelileyo, kwafa abadala abangu-30 bakuleli kunye labantwana abayisithupha ababegade ibhasi eyayisiya eHarare leMalawi.
Kungozi le, kwafa njalo amadoda ayisifica minwe mibili eMalawi, owesifazana oyedwa kunye lomntwana, kwalimala abantu abangu-40.
NgoMvulo bekulezizalwane zakuleli ezingu-12 kunye leziyisikhombisa ezeMalawi ebezilokhu zilalisiwe ezibhedlela ezisesabelweni seLimpopo.
uShepard Gwenzi onguZimbabwe’s Charge d’Affaires kweleSouth Africa uqinisekise ngenhlelo zokulethwa kwezidumbu kuleli.
“Mhlaka 20 kuMfumfu, ukuhlolwa kwezidumbu ngabezimuli kwenziwa kuhle emotsha yeSiloam Hospital. Kukhangelelwe ukuba izidumbu zinikwe iDoves Funeral Services ukuze zilungiswe kulungiselelwa ukulethwa kweleZimbabwe ukuzongcwatshwa,” kutsho uGwenzi.
