Online Reporter
Sikhumbuzo Moyo
KULEZAKHAMIZI zesiqintini seNsango 1, kuWadi 22 eNsiza eziphakathi kobuhlungu kulandela ukulahlekelwa yizifuyo zazo ngemva kokuba zitshaywe zintambo zamagetsi eziqamukileyo.
Isehlakalo lesi, senzakale ngeviki edluleyo lapho izakhamizi ezimbili uMnumzana Nivas Dube loMnumzana Gumai Matola ezilahlekelwe zinkomo eziyisificamunwe munye.
UMnu Dube ufelwe ngezintathu kukanti uMnu Matola ufelwe ngeziyisithupha ezinye zakhona ebezingamathokazi.
UMnu Dube uthe: “Ngimadolonzima ngilapha ngoba ezinye inkomo zami bezingamathokazi.”
UMnu Matola uthe usazama ukwamukela okumehleleyo. Kwezami inkomo bekulamathokazi amathathu, asazi kumbe iZimbabwe Electricity Transmission and Distribution Company (ZETDC) izasibhadala inkomo zethu ezitshaywe ngamagetsi.
UMnu Matola uqhubeke wathi: “Ngilahlekelwe kakhulu. Silokukhathazeka njengabantu balapha ukuthi akuqalisi ukuthi izifuyo zethu zitshaywe ngamagetsi lapha ngenxa yentambo eziphansi”.
UMnu Dube uthe bakhathazekile ngokuthi lanxa babikela amapholisa leZETDC ngoLwesibili, ilanga okwenzakala ngalo isehlakalo, izisebenzi zeZETDC zize zafika ngoLwesine, kukanti amapholisa afika ngeSonto izidumbu zenkomo zakhona sezibola.
Izakhamizi zicele inkampani yeZETDC ukuthi ilungise masinyane intambo lezi njalo inakekele ngendlela efaneleyo impahla yayo ukwenzela ukuvikela ukulahleka kwezifuyo okuqhubekayo kanye lengozi ezingaba khona empilweni zabantu.
