Online Reporter
YiNtatheli kaMthunywa
KULENDODA yeHonde Valley ebulewe ngumakhelwane wayo ngemva kokuba ilande umkamakhelwane lo imbuza ngamahemuhemu okubikwa lumfazi kamakhelwane ubehamba ewasakaza emphakathini.
Omele isikhulumi samapholisa eManicaland, u-Assistant Inspector Wiseman Chinyoka uqinisekise lesi sehlakalo, ethi le mpikiswano eyasuka ekukhulumeni ngamahemuhemu, yakhula yaba yimpi elavukayo eyakhokhela ekufeni kukaGledman Shingirai Kufahakutizwi (38) ovela eMatingo Village ngaphansi kwenduna uMutasa.
“Lo osengumuyi kubikwa wavakatshela emzini kaWebster Mwamuka mhlaka 3 Lwezi, ehlose ukuyabuza umkaMwamuka uRufaro Madziro ngamahemuhemu ayecabangela ukuthi uhamba ewakhuluma ngomdeni wakhe.
“Okwaqala kuyikutshintshana kwamazwi kwaphanga kwaba kubi nanko phela uKufahakutizwi wadobha ibhakede elilamanzi wawathela ebusweni buka Madziro. Inina leli lahle lahlaba umkhosi,” utsho njalo.
U-Asst Insp Chinyoka uthe umkaMadziro, uMwamuka wabuza uKufahakutizwi ukuba ukwenzeleni lokhu okwabangela ukuthi kuqale ukuliwa. Ngesikhathi besilwa uKufahakutizwi wadobha umphini wazama ukutshaya uMwamuka kodwa wakhutha. UMwamuka ebona lokhu wadobha laye ilitshe watshaya uKufahakutizvi esiphongo ngalo okwabangela ukuthi atshayeke phansi ngekhanda waqala ukopha.
“UMwamuka lonkosikazi wakhe bazama ukusiza, kodwa uKufahakutizwi waqhubeka enganyikinyeki. Omunye umakhelwane uCourage Magota (19), wasuka lapho wayabikela amapholisa ngesehlakalo lesi,” utsho njalo.
U-Asst Insp Chinyoka uthe amapholisa afika endaweni yesehlakalo afica uKufahakutizwi esethule okwabangela ukuthi abophe uMwamuka. Isidumbu sikaKufahakutizwi sasiwa eHauna District Hospital lapho okwaqinisekiswa ukufa kwakhe,” utsho njalo.
U-Asst Insp Chinyoka uxwayise abantu ukuthi bangabozama ukulungisa inkinga ngokulwa kodwa badinge usizo emapholiseni kumbe ebadaleni.
“Abantu kumele bafunde ukuthi udlame alwaze lwalungisa lutho, isiphetho yikufa komuntu kuphela.
“Nxa kulokuhluphayo abantu abadinge usizo emapholiseni.
“Nxa uzizwa uzondile ngalokhu okwenziwe ngomunye, bika udaba lwakho emapholiseni kumbe kubukhokheli bomdabu kulokulwa,” kuphetha uAsst Insp Chinyoka.
