Online Reporter
Nkosilathi Sibanda
USODOLOBHO wakoBulawayo uDavid Coltart uthe badinga imali engange US$14,5 miliyoni yokulungisa lokuvuselela impompi leminye imitshina yamanzi, okubikwa isihlale isikhathi eside.
Wethule lumbiko ngesikhathi kuqhutshwa umhlangano weMatabeleland Water Indaba ngeviki edluleyo lapho abemelwe khona ngukhansila ka-ward 25, u-Aleck Ndlovu.
“Idolobho lifuna imali enengi ekulungiseni imitshina yamanzi. Eminye imitshina le isiyedlulise isikhathi, osekudale ukuthi kube lokudubuka kwempompi, silahlekelwe ngamanzi okumele agcinwe,” kutsho uColtart, kumbiko wakhe lo okhitshwe yiMasiyephambili Weekly.
USodolobho lo uthe nxa ikhansili ingasoze ilungise imitshina lempompi zamanzi, kuzaqhubeka kusiba lokuphazamiseka ekutholiseni izakhamizi amanzi.
“Ikhansili isibeke amacebo kulokho. Kusikhathi esifitshane, sidinga i-US$14,5 miliyoni.”
Uthe elinye icebo yikusungula inkampani yamanzi ezabe ingaphansi kwekhansili kunye lokuhlanza kutsha amanzi.
“Idolobho lakoBulawayo lifuna ukusungula inkampani ezaphatha ukugcinwa lokutholiswa kwamanzi. Silomzekeliso omuhle eWindhoek, eNamibia lapho asebehlanza kakutsha amanzi asetshenzisiweyo, abesehanjiswa emafekithali. Mhlawumbe sekuyisikhathi sokuthi koBulawayo kwamukelwe.”
