Online Reporter
Ethel Ncube
KWEHLE iyezi elimnyama koBulawayo kulandela ukugalula kwamantombazana amabili ebhukutsha labangane babo egodini elingasebenziyo ePumula North, koBulawayo.
Indaba le yenzakale ngeSonto lapho okugalule abantwana ababili abaleminyaka engu-11 bebhukutsha kwelinye igodi elilamanzi, ngokusweleka kwenhlanhla behluleka ukuphuma kilo.
Isikhulumi samapholisa koBulawayo u-Inspector Nomalanga Msebele uqinisekise ngesehlakalo sokufa okungalindelekile esenzeke ngeSonto, mhlaka 8 Nhlolanja 2026, ngehola lika-3 ntambama.
Amankazana la amabili kubikwa ayebhukutsha labanye abantwana egodini elingasasebenziyo, eligcwele amanzi. Abanye bethuka sebebona abanye babo besehluleka ukuphuma emanzini, baqala ukukhala, kwabuya omunye umfana oleminyaka engu-15 owayebhukutsha kwelinye igodi, wafika wakhipha abantwana laba kodwa sebedlule emhlabeni.
U-Insp Msebele uthe njengamapholisa, balusizi ngokulahleka kwemiphefumulo.
“Kugalule abantwana ababili ePumula North bebhukutsha egodini elilamanzi.
“Sikhuthaza abazali, abadala kumbe izakhamizi ukuthi bangathola abantwana loba ngabakabani bebhukutsha emagodini babaxotshe ukuze sivikele ukulahleka kwemiphefumulo.
“Sikhuthaza abazali ukuthi ngazo zonke izikhathi bahlale bekhangela abantwana lapho abadlalela khona ukuze kuvikelwe izingozi ezifana lalezi,” kutsho uInsp Msebele.
