Online Reporter
Ethel Ncube
KWEHLE iyezi elimnyama kwenye imuli yesigabeni seVengai eMberengwa ngemva kokuba kugalule abantwana bemuli yinye echibini lokufuyela inhlanzi ngekhaya.
Lokhu kwenzakale ngoLwesihlanu lweviki ephelileyo. Abantwana abatshonileyo baleminyaka engu-5 kuthi ababili bayalingana baleminyaka engu-6.
Kubikwe ukuba uAlpheos Shumba oleminyaka engu-65 yokuzalwa nguye owathola izidumbu zabantwana laba zindenda emanzini. Abantwana bakhulula impahla bangena emanzini ngenhloso yokuba babhukutshe kukanti babizwa yikufa. Bathi sebephakathi bagalula. Abatshonayo nguAdroid Sgumba oleminyaka engu-6, Nokutenda Maidza oleminyaka engu-6 yokuzalwa loTarironyashe Maidza oleminyaka engu-5 yokuzalwa. Ngesikhathi betholakala izigqoko ababezigqokile zazingaphandle kwechibi leli zikumango ongaba yi-3m. Ichibi leli lalitshona okufika 1,5 metres kuthi ubude liyi 14 metres. Izidumbu zabantwana zisiwe esibhedlela seMusume Mission Hospital ukuze ziyehlolwa.
Intatheli ixhumane lesikhulumi samapholisa eMidlands uInspector Emanuel Mahoko obike ukuba indaba enjalo isezandleni zamapholisa.
“Sikhuthaza abazali labantu abakhangela abantwana ukuba bahlale benanzelela njalo bakhangele abantwana lapho abayabe bedlalela khona ngaso sonke isikhathi ukuze kwenqatshelwe ingozi ezifana lale,” kuphetha uInsp Mahoko.
