Online Reporter
Ethel Ncube
KUGALULE kwafa abantu abathathu emfuleni uSebakwe, eKwekwe kulandela ukuba inqola akade beyigadile ithethwe ngamanzi ngosuku lweKhisimusi.
Kubikwa ngehola lesibili ekuseni, uNomatter Denhere, olemninyaka engu-20, lomntanakhe uTatenda Gotore olomnyaka lengxenye kunye loTrymore Ngwenya oleminyaka engu-34 abepulazini leLozani, eKwekwe babechapha umfula uSebakwe begade inqola besiya ngekhaya ngokusweleka kwenhlanhla inqola yasithathwa ngamanzi.
Kuvele ukuba abanye ababili ababelabo benelisa ukubhukutsha baphuma emfuleni.
Omunye walabo abaphephayo wenelisa njalo ukuyabikela amapholisa ngesehlakalo lesi.
Mhlaka 26 Mpalakazi ngehola lika 9 ekuseni, kwatholakala isidumbu sikaTrymore Ngwenya ezihlahleni phakathi komfula uSebakwe.
Amapholisa abona ngezemanzini abeSub Aqua basadinga imizimba kaNomatter lomntanakhe abayibo abangakatholakali.
Isikhulumi samapholisa eMidlands uInspector Emmanuel Mahoko uxwayise uzulu ukuba angalingi achaphe imfula igcwele.
“Sikhuthaza uzulu ukuba angachaphi imfula igcwele njalo abantwana bangekelwa bedlalela emanzini ngoba impilo siphila kanye ingakulahlekela ungeke uyithole futhi,” kutsho uInsp Mahoko.
