Online Reporter
KUTHOLAKALE inyathi ezingaba yi-90 zifile esiqintini seKavimba eduzane leKabulala Conservancy eNamibia kulandela ukuxotshaniswa yizilwane okubangele ukuthi ziwele emfuleni zigalule..
“Inyathi lezi bezibalekela izilwane ngesikhathi zisiwa zisuka endaweni ephezulu (cliff) zayawela kumfula uChobe,” kutsho isitatimende esikhitshwe ngabogatsha olubona ngezemvelo kulelo.
Okhulumela ugatsha lolu uNdeshipanda Hamunyela uchasise ngalesi sehlakalo ethi ukufa kwenyamazana lezi kubangelwe yikuthi inyathi zethuswe yizilwane okwenze zagijima zisiyawela emanzini.
“Abogatsha lwethu labezomthetho bakhonale ukuze isimo siphathwe ngendlela. Inyathi lezi zizabelwa izakhamizi,” kutsho uHamunyela kusitatimende. Izisebenzi zeKabulabula Conservancy ziqinisekise ukuthi lokhu akwenzakali okwakuqala njengoba kuhlala kusenzakala lapho inyamazana zibalekela izilwane lezinye inyamazana ezizingelayo kumngcele zisuka eChobe National Park, eBotswana eyaziwa ngokuba lenyamazana ezinengi ezifana lendlovu, inyathi lezinye.
“Nxa zixotshaniswa yizilwane, ziyabaleka zizame ukuchapha umngcele zingene eNamibia zicine zigxobana,” kutsho uMbeha Tadeaous osebenza kuConservancy.
Izehlakalo ezifanayo zike zabakhona njalo ngomnyaka ka 2018 lapho okwafa inyathi ezingu-400 kumfula uChobe lo2023 okwenza ababona ngezenyamazana zeganga bakhathazeke kakhulu.
