shloboe boe
Nkosilathi Sibanda
INDLELA ziqonde esigabeni seBinga kulimpelaviki kumjaho weBinga Kasambabezi Marathon ngempelaviki lapho okukhangelelwe ukuthi kugijime abantu abangafika 1000.
Omunye wabaqoqi beBinga Kasambabezi Marathon, uRecent Ncube utshele iphephandaba likazulu ngoLwesibili ukuthi sebelungiselele.
“Zonke ingatsha zethu, abaxhasi bomjaho labamabhizimusi akhona, asebike ukuthi asewulungiselele umncintiswano walonyaka. Sikhangelele ukuthi kube labantu abanengi ukwedlula emnyakeni edluleyo.
“Sibonga abaxhasi bethu abalokhe besifinyelela lakhathesi njalo amanye amankampani lokhe ethembisa ukuba lathi. Akhona ngalesi isikhathi agoqela iAfrican Century Bank, Anglican, Kotina, KMTC, Cesteg, iBinga Local Board leRural District
Council, Twice Happy Lodge, Fisheries, Econet, Netone lezinye. Inani lemivuzo lizavezwa ngoLwesine ekuseni,” kutsho uNcube.
Uthe lonyaka akusoke kube lomncintiswano wokugijima kuphela nanko banxuse lenhlanganiso zemidlalo ye-volleyball, ichess le-pool. Ubike ukuba bafuna ukusebenzisa i-marathon yabo ukuze kusungulwe eminye imidlalo eBinga.
“Sizakuba lenhlelo zokukhulumisana lomphakathi mayelana ngezempilakahle, njengoba enye inhloso yethu ingeyokukhuthaza abantu ukuthi bagcine imizimba yabo iqinile. Sizakuba lemikhosi lapho esizabe sibukisa, sibabaza amasiko lemikhuba yakulindawo.
“Sifuna ukuthi iBinga Kasambabezi Marathon itshengise iBinga njengendawo okumele ivakatshelwe ngabanengi. Kuzakuba yimpelasonto egcwele ezemidlalo lokukholisa. Zinengi ingatsha ezixhase ihlandla lalonyaka. Abantu abeze ngobunengi babo.”
Enye inhloso yalumncintiswano yikuqogelela imali lokunye okuthile okuzancedisa ukuthi izikolo zonke zeBinga zibe lemitshina yakulezinsuku kusiyafika umnyaka ka2040.
Labo abazancintisa, bazaphatheka ku42km, 21km, 10km le5km yokuzikholisela. Kulehlandla lalabo abagijima nge-wheelchair le50km yamabhayisikili.
Umjaho wakuqala, owe42km uzagijinywa kusukela ngo6.30am.
Online Reporter