Online Reporter
Fungai Muderere
AMAQEMBU omdlalo we-pool iQueens Academy, Premier, Entumbane le-Kings aphume phambili emncintiswaneni weBulawayo Province Pool Association (BPAA) ngePhasika, obuqhutshelwe endaweni ezitshiyeneyo edolobheni lakoBulawayo.
Umncintiswano lo ubumqoka ngoba kube ngokwakuqala kunhlanganiso yeBPAA ukuthi kusetshenziswe inkundla ezinhlanu ezehlukeneyo, okutsho ukuthi amaqembu abengasancintisani endaweni eyodwa kuphela.
Kusetshenziswe inkundla ezigoqela iSouthworld, Nokkies, Nkulumane, Golden Pillars leGibixhegu.
“Lolu hlelo olutsha luphumelele kakhulu ngoba amaqembu adlale endaweni ezitshiyeneyo ngesikhathi sePhasika. Eminyakeni edlule besisebenzisa inkundla eyodwa kuphela,” kutsho uOsborne Wells Dziko.
ESouthworld, iQueens Academy Pool Club iphenduke intshantshu ngemva kokwehlula iGolden Lion, QPA, Khami leTeam Perfect.
ENokkies, iPremier ibithwele uswazi yaphuma ikhokhela ngemva kokunqoba iDragon, Fast Cash leLobengula Shaks.
ENkulumane, iqembu elilodumo kuBPAA, iNtumbane, linqobe iRaylton, Exchange kunye labanikazi benkundla.
EGolden Pillars, iRenegades ibingaqondwa muntu, inqobe i-AutoCom, Vultures leLegends.
Enkundleni yeKings, iphinde yatshengisa amandla ngokunqoba iDelta, ZPC le Expendables.
Kusenjalo, umqeqetshi wabahluleli owaziwayo uRichard Mutenda uthe kumele kukhuliswe inani labahluleli ukuze imidlalo ihambe kahle.
“Sidinga abahluleli abanengi ngoba eMatabeleland bambalwa. Amathimu ayaqhubeka ngokungena kuligi, kodwa abantu abanengi kabakayiqondi kuhle imithetho yeBlackball.
“Sifuna umdlalo uthuthuke, kungabi lokuphikisana phakathi kwabadlali,” kutsho uMutenda.
Uthe kusukela kuqale isizini kube lezikhalazo ezithile zokuphikisana, kodwa ukuqeqetshwa kwabahluleli kuzasiza ukunciphisa lokho.
