Online Reporter
Nkosilathi Sibanda
UKUXOTSHWA umsebenzi kukaMichael Nees kube linyathelo elihle elenziwe yiZifa ngoba umqeqetshi lo ubeyisehluleki enkundleni, kubika abalandeli beqembu lamaWarriors.
IZifa ithe isiphakathi kokudinga umqeqetshi omutsha, ozafika atshintshe izinto zibe ngcono, nanko amaWarriors azakuya ku-Afcon ngoMpalakazi.
UNees utshelwe ukuthi apakitshe ezakhe ngoLwesithathu ntambama, lapho atshelwe ukuthi isizatho sokukhitshwa kwakhe esikhundleni bekuyikuthi wehluleke ukunqoba ngendlela eyayikhangelelwe.
“Inhlanganiso yeZimbabwe Football Association (ZIFA) ithanda ukwazisa bonke abaphathekayo kunye lomphakathi ukuthi i-Executive Committee isinqume ukwesula isivumelwano loMichael Nees,” kubika iZifa kumbiko wayo.
Umongameli weZifa uNqobile Magwizi uthe benze lelinyathelo kulandela ukuxoxisana lenhlangothi ezinengi emdlalweni.
“Silenhlangothi ezehlukeneyo ezigoqela abalandeli, uHulumende lamaqembu. Njengekhomithi ye-executive, besibeke okuthile ebesikukhangelele kodwa akuzange kwenzeke,” kutsho uMagwizi.
“Okwakhathesi sesilinde ukuthi sikhulume lomuntu ongafika akhuphukise izinga kumaWarriors.”
UNees, odabuka eGermany, uqhatshwe kumaWarriors ngoNtulikazi 2024 ephiwe umlandu okweminyaka emibili.
Wenelisa ukunqoba imidlalo emibili phakathi kwelitshumi.
Ukuxotshwa kukaNees kulethe imibono eyahlukeneyo kubalandeli bamaWarriors.
UThabiso “Gundu” Dube uthe: “Ukuxotshwa kukaNes akungiphathanga kuhle. Ubeseyihlanganisa ithimu. Bekumele bamnikeze elinye ithuba, mhlawumbe aqede i-Afcon. Ngibona angathi iZifa iphambanisile lapho.”
Omunye, u-Admire Sibanda uthe uNees wenza iphutha ngakho kumele ahambe.
“Ngokubona kwami uNees kazange asebenze kuhle. Wadlalisa abadlali asebegugile, abaleminyaka yokuzalwa ephezulu kwe-30. Akuzange kusithokozise. Singabuyela emuva sikhangele imidlalo yakhe edluleyo, kuyavela ukuthi wadlalisa abantu abangayisibo. Kusiyaphambili, kumele sibize abadlali abasacathula, abalakho ukuthi babumbe iqembu eliqinileyo, elilekusasa enhle.”
