Online Reporter
Fungai Muderere
UMNCINTISWANO wokukhumbula umdlali wenguqu ongasekho emhlabeni uTendai “Fire” Ndoro ukhangelelwe ukuthi uqhutshwe mhlaka 21 kusiya kumhlaka 22 Zibandlela.
Imidlalo le, eyisikhumbuzo sikaNdoro, owadlalela amaWarriors, Chicken Inn le-Orlando Pirates izabe iselokitshini leNketa laseNkulumane koBulawayo.
UNdoro, obeleminyaka yokuzalwa engu-40, udlule emhlabeni ngoNcwabakazi eseGoli.
Unobhala wabaqoqi bomncintiswano uKudakwashe “Matshada” Mupatsi utshele iphephandaba likazulu ukuthi kuzabe kulamaqembu angu-15 azancintisana.
“Sikhumbula umfowethu, iqhawe lethu, iqhawe lenguqu elizweni. UTendai Ndoro ubengumdlali olodumo lapha eNketa laseNkulumane, lakoBulawayo jikelele. Ibizo lakhe lihlonitshwa laseGoli, ngakho ke sithi asimhlonipheni, simkhumbule mhlaka 21 lamhlaka 22 kulinyanga.
Uqhubeke wathi: “Sikhangelele amaqembu angu-16 ukuthi aphatheke emncintiswaneni. Silokuthaba ukuthi kulabosaziwayo abanjengo Peter Ndlovu, Zenzo Moyo loRonald Sibanda abazabe bekhona.
“Amaqembu asekhulume ngokuzimisela kwawo yiNketa 9 FC, Funda Ukulinda, Eastern Strikers, Brotherhood, Eastern Bullets, Decom FC, Vula Vale Magwegwe North, Ndlola FC, Mzilikazi Pirates, Nketa Stars, Nketa 6 FC, Sekusile, Emganwini Legends, Celtics FC leBarca 9.”
