Online Reporter
Fungai Muderere
SIZWAKELE isikhalazo sabaqeqetshi benguqu kuleli, esokuswelakala kwezifundo zokwengeza ulwazi emdlalweni, nanko inhlanganiso ephethe inguqu kuleli, iZimbabwe Football Association (Zifa) ibika ukuba isiphezulu kohlelo lokwethula izifundo zeConfederation of African Football (Caf) A, B, C.
Kade kwacina ukuqhutshwa izifundo zakuleli ibanga kuleli, okudale ukuthi inengi labaqeqetshi lisalele emuva, lilahlekelwe yimisebenzi. Lokhu yikho njalo okungabe kudala ukuthi amaqembu akumaligi atshiyeneyo kuleli angatshengisi umdlalo ohlabusayo, ngoba abaqeqetshi basemuva. Ekadeni izifundo lezi bezitholakala eBotswana laseTanzania.
Kodwa, loba kuyindaba emnandi ukuvulwa kwamakilasi eCaf, labo abafuna ukufunda kumele batshonise isandla ezikhwameni, bakhiphe i-US$300. Ngokuzwa kwephephandaba likazulu, kulabaqeqetshi asebeqalisile ukuyidinga imali, behlose ukuthi mhla beqeda izifundo, bathole amathuba amadlelo amahle phetsheya.
Kuminyaka edluleyo, abasondelela amakilasi eCaf ngumsekeli kamqeqetshi weHighlanders uTry Ncube, owake waqeqetsha iBulawayo Chiefs uThulani “Thuts” Sibanda, Bongani Mafu loPeter “Nsukuzonke” Ndlovu labanye.
Omunye wabaqeqetshi okhulume lephephandaba likazulu, uXolani “Skweya” Nkundlande uthe:
“Zindaba ezimnandi lezo. Obekusivalela phandle yikuthi kuyadula ukufundela phandle kwelizwe.
“Kodwa nxa izifundo zeCaf sezikhona kwelakithi, sizakuba labaqeqetshi abanengi abafundileyo. Ngikhuthaza abanye bami ukuthi bakhuthalele ukuba senhlelweni lezi. Kuhle lokhu, sibonga inkokheli zeZifa, sisithi kaziqhubekele phambili.”
