Online Reporter
Fungai Muderere
INHLANGANISO yeZimbabwe Football Association (Zifa) isimise umsebenzi onompembe ababili, uRonald Chinyani lo-Oscar Bumhe.
Bobabili bamiswe ukuphatha imidlalo kulandela isehlakalo esenzakala kumdlalo weHighlanders leChicken Inn owawuseBarbourfields mhlaka 19 Ncwabakazi.
Abaphathi bomdlalo laba bobabili bazamiswa kumidlalo yeviki lesi-28 kusiya ku-33 njengengxenye yezijeziso.
Isinqumo lesi silandela umbiko owethulwe nguKhomishina womdlalo lapho onompembe laba abathatha isinqumo esingaqondanga.
IZifa ithe isinqumo sokuqondisa abaphathi bomdlalo laba sithethwe kulandela i-Article 22 yeZifa Referees Code of Conduct, okugcizelela ukuzimisela kwenhlanganiso ukuqinisekisa ukuthi abaphathi bomdlalo bayabuzisiswa ngezinqumo abazenzayo.
Kumbiko wayo, iZifa ithe izijeziso lezi zilinyathelo elidingekayo ekugcineni amazinga akhangelelwe kubaphathi bemidlalo abasebenza kuligi ephezulu.
“Izijeziso lezi zilandela umbiko kaKhomishina womdlalo owawuphakathi kweHighlanders FC leChicken Inn FC owawuseBarbourfields Stadium mhlaka 19 Ncwabakazi 2026, lapho isinqumo esasingaqondanga esathathwa saba lomthelela kumpumela yomdlalo,” kutsho iZifa.
Inhlanganiso yengeze yathi isenzo lesi sithethwe kulandelwa imithetho yayo yokuphatha onompembe.
“Isenzo lesi sithethwe kulandela i-Article 22 yeZifa Referees Code of Conduct,” kutsho inhlanganiso.
Ukumiswa kukaChinyani loBumhe kutsho ukuthi kabasoze batholakale emidlalweni eyisithupha ebalulekileyo ngesikhathi iligi isingena esigabeni esiqakathekileyo somncintiswano.
IZifa iphinde yasebenzisa leli thuba ukugcizelela ukuzimisela kwayo ekuthuthukiseni izinga lokuphathwa kwemidlalo.
“IZifa izimisele ukugcina amazinga aphezulu okuphathwa kwemidlalo, ukuphendula lokuthembeka kuyo yonke imidlalo.”
Isijeziso esibekwe yiZifa kukhangelelwe ukuthi sivuselele ingxoxo mayelana lokuphathwa kwemidlalo elizweni.
