Online Reporter
Yintatheli kaMthunywa
UMONGAMELI welizwe uEmmerson Mnangagwa wethule iClemency Order No. 1 ka-2026 ekhuphe izibotshwa ezingu-4 305 ngenhloso yokwehlisa ukuminyana emajele.
Ekhuluma ngalokhu, uMphathintambo wogatsha lweJustice, Legal and Parliamentary Affairs kuHulumende, uZiyambi Ziyambi uthe uMongameli usebenzise ilungelo lakhe elisemthethweni lokupha isihawu kuzibotshwa ngaphansi kwesigaba 112(1)(a) lo-(d) sesisekelo zombuso. “Ngithatha lelithuba ukwazisa ukuthi uMhlonitshwa uMongameli welizwe usebenzise ilungelo lakhe lokupha isihawu,” kutsho uZiyambi.
Uthe umthetho lo, owethulwe ngaphansi kweGeneral Notice 99 ka-2026, utshengisa ukuzimisela kukaHulumende ekukhuthazeni ukulungiswa lokubuyiswa kwezibotshwa emphakathini, isihawu lokuthi amajele abe zindawo zokuguquka hatshi ukujezisa kuphela.
Uthe uxolo luka-2026 luqondiswe kulabo abasesimweni esibuthakathaka kunye lezibotshwa eziveze intuthuko ekuziphatheni kwazo.
Izibotshwa ezizaxolelwa zihlanganisa bonke abesifazane ngaphandle kwalabo abenza amacala athile, abaleminyaka engaphansi kwe-18 yokuzalwa, abagwetshwe inyanga ezingu-48 kusiyaphansi, abaleminyaka engu-60 kusiyaphezulu yokuzalwa, abagulayo, abakhubazekileyo, abagcinwe emajele avulekileyo; kanye lalabo asebehlale ejele okungenani iminyaka engu-20, okubalwa lalabo abake bagwetshelwa ukufa isigwebo sabo satshintshwa saba ngesempilo yonke.
Kodwa-ke, labo abagwetshwe ngamacala abalisa ukubulala, itreason, ukudlwengula, ubugebengu, ukwenza ubugebengu uhlomile, ukuthumba izimota, udlakela emphakathini lokuthengisa abantu, kabahlanganiswanga kuloluxolo.
UZiyambi ukhuthaze imuli, umphakathi kanye lamabhizimusi ukuthi bamukele baphinde basekele labo abakhululiweyo ukuze babuyele emphakathini ngendlela enhle. “Uxolo kalutsho ukuthi amacala abawenzayo mancane, kodwa lutshengisa ukuthi umuntu ulakho ukuguquka,” kutsho uZiyambi.
