Online Reporter
Lovemore Dube
KUKHUNJULWE uNdumiso Gumede owayedume ngobukhokheli kunguqu lokunengi empilweni yabantu beZimbabwe, ngoMvulo kuyonale iviki.
Abantu abedlula ikhulu lengxenye babuthane eNyathi Mission ngekhefu lamaqhawe, lapho okube lenkonzo yokumkhumbula, qede lapho kwavulwa ilitshe ethuneni lakhe.
UGumede wedlule emhlabeni mhlaka 29 Mpandula ngo 2021.
UGumede wazalwa mhlaka 14 Mfumfu 1945, wakhulela esigabeni seMzingwane lapho aqala khona imfundo yakhe engaka qhubekeli phambili esikolo seNyathi laseMpopoma High.
Wakhetha ukuba ngumbalisi we-Science, ephuma eGweru Teachers’ College, andubana athole umsebenzi wakhe wakuqala eHighfields High School lapho afundisa inengi, eligoqela umsakazi wodumo uJohn Masuku lo-Oliver Kateya.
Ngasikhathi esedlula emhlabeni, ubengumongameli weqembu leHighlanders, lapho abamba intambo zobukhokheli kusukela ngo1978.
Isikhathi sakhe sonke ekuqembu wenza okunengi okubambekayo, okwaba yisitshengiselo sokuthi wasebenza kuhle.
Izikhululumi ebezikhona kusikhumbuzo lesi, zibabaze imisebenzi yakhe emphakathini, kwezamasiko, kwezemfundo lakunguqu, okuyikho okwamphakamisa wathandwa yiZimbabwe yonke.
UVincent Pamire owake wabangumkhokheli weZimbabwe Football Association (Zifa) leqembu leZimbabwe Saints, uthe waphila wasebenza kuhle loGumede.
“Ngasebenza laye okwesikhathi eside. Wayeyindoda emangalisayo kodwa ezehlisa esenelisa ukuphila labantu bonke. Wayethanda imuli yakhe ikakhulu unina.
“Yimi engayamthatha eBotswana ukuthi azokuba ngumaqhuzu weZifa,” kutsho uPamire.
Usobhuku wesigaba u-Airforce Hlabangana uthe imisebenzi kaGumede kuHighlanders ingathi seyanindwa udaka, sokusala enkundleni. Uthe labadlalela iqembu kabasaziwa.
“Ayisanqobi iHighlanders. Nxa kuthiwa inqobile, iyabe idlale ngokulingana, labadlali asisabazi,” kutsho uHlabangana.
UNkululeko Zidla, ongumphathi wesikolo seNyathi High School uthe uGumede wayeyindoda emadodeni.
UZidla uthe uGumede waphathisa kakhulu kunhlelo ezinengi zesikolo esebenza lequla leFormer Inyathi Students Association (Fisa) ekuthengeni ibhasi lokuvuselela ezinye inhlelo esikolo.
Uthe bona bayaziqhenya njalo ngokuba labanye osaziwayo abafunda kulesi isikolo, abakhokhela iHighlanders, ababalisa uThemba Ndlela loRoger Muhlwa.
“UGumede wayeyindoda eyayizehlisa kakhulu. Ubeyisakhamuzi esiphakamisa isikolo. Wenza okunengi njalo wayesipha amabhola lezokugqoka,” kutsho uZidla.
Okunye abukwa ngakho uGumede ngezemfundo, lapho ayephathisa abaswelayo. Kulabantwana ababili abalokhe bethola usekelo lwakhe.
Udadewabo kamuyi, uCephekhulu Fuyane utshele intatheli ukuthi imuli isele igcwalisa isifiso somfowabo ngokunakekela laba abantwana.
Uthe kulombono wokuthi kusungulwe i-Trust ezakhangelana lomlandu lo.
Umgcinisihlalo weHighlanders, uLuke Mnkandla uncome uGumede ngokuzinikela kwakhe eqenjini, kusukela ngo-1970.
