Online Reporter
Ethel Ncube
ABABONA ngezokulima sebebike ukuba ihanyanisi eyi-purple (red onion) idinga ukulinywa lapho okuvunde khona ukuze kuphume isivuno esiphezulu.
UNkosazana Siphiwe Ndlovu ongu-specialist kweze-horticulture uveze ukuba ihanyanisi le ifuna indawo evundileyo.
“Ihanyanisi le lingayesabeli khatshana balimi ukuyilima, iyafana lokulima eminye imihlobo yehanyanisi, ekufunayo kuphela yikuthi lapho elinywe khona kube le-nitrogen.
Indawo yakho nxa ingavundanga uyathatha umvundiso we-compost ufake esivandeni ukuze unonise indawo lapho ozahlanyela khona.
Nxa uhlanyela inhlanyelo yehanyanisi uyayihlanyela endlini kumbe lapho okuvaleke khona. Ithatha amaviki angu-8 kusiya ku-10 kusuka lapho sungathatha usaba lwakho ngemva kwamaviki la uyehlanyela esivandeni sakho.
Isilimo lesilimo kumele sitshiyane nge-4 inches.
Ukuthelela kumele ubone ukuba uyayithelela kokuphela ukuze ikhule kuhle njalo kumele lapho ohlanyele khona kube lelanga okwamahola ayi-6 kusiyaphezulu,” kutsho uNkszn Ndlovu.
Ubuye waveza ukuba ihanyanisi le idingwa ukunakekelwa.
“Nxa ihanyanisi yakho isihlaselwe lukhula kumele ubone ukuba uyalukhipha. Nxa ukhipha ukhula kumele unanzelele ungaphazamisi amajodo ehanyanisi.
“Ihanyanisi le ithatha amalanga angu-90 ukuba ivunwe. Nxa isilungele ukuvunwa uyabona ngamahlamvu ayo esesiwa phansi njalo amanye ayatshintsha lombala wayo.
“Ekuvuneni lakho kumele unanzelele ungathinti amajodo ngoba ungawasika kucina kusehlisa isivuno sakho engasomi kuhle esebola nxa usuwomisa,” kuphetha uNkszn Ndlovu.
