Online Reporter
Mbulelo Mpofu
ABENZA umsebenzi wokucomba kunye lokudweba kuleli bazangena kuzifundo ezizabaphathisa ukuthi benelise ukuchasisa ngemisebenzi le, kuhlelo oluqoqwe yi-ARAK Collection leNational Art Gallery koBulawayo.
Izifundo lezi, ezizaqhutshwa amalanga amathathu, kusukela mhlaka 10 kusiya ku12 Mpandula, zizakhokhelwa nguThembinkosi Goniwe, ingcitshi kwezokuhlaziywa kwemisebenzi yokucomba.
Inhlanganiso ye-ARAK Collection ibika ukuba izimisela ukuthi isungule ingxoxo kumisebenzi yokucomba ephuma e-Africa, egxile kumasiko lempilo yansukuzonke.
Indikimba yezifundo ngethi: Zimbabwe on My Mind.
Kukhangelelwe ukuthi uGoniwe alolonge abalobi, abacebise indlela yokuhlaziya lokwamukela imisebenzi yokucomba lokudweba.
Abazaphatheka kuzifundo lezi bazaphiwa ithuba lokuthi batshengise imibono yabo, bethule ukuthi kuyini okumele kwenzakale kuhlangothi lwezokudweba lokucomba kuleli. Bazavakatshela lendawo ezitshiyeneyo kuma-studiyo eHarare lakwezinye indawo. Kuzakuba lemihloliso, kuhlaziywa indlela abalobi ababeka ngayo udaba lokucomba lokudweba.
