Online Reporter
Bhekimpilo Tshalibe
AMAPHOLISA ePlumtree abophe abetheswacala abahlanu abasolwa ngokubulala enye indoda ebhawa yeMathendele Extension ngoba isilwa lesithandwa sayo.
Kubikwa uMxolisi Ncube wayesilwa lesithandwa sakhe uChristabel Mlambo (29) ngehola lesificamunwe munye ebusuku ebhawa okuthiwa yiPhezulu Bar.
Kuzwakale ukuthi amadoda amane abalisa uShepherd Hwikwa (41), Onesimo Moyo (37), Mark Sandile Moyo (22) lokutholakale ukuthi nguNdlovu kuphela oleminyaka engu-23 bacina bengenela kungxabano yababili laba.
Omunye wabetheswacala wafuqa uNcube wayawela phezulu kwesamende, bathe abanye bezama ukumvusa, abetheswacala bathela uNcube ngebhakede lamanzi qede babaleka.
Kubikwa amapholisa athola umzimba kaNcube ulokhu uphezulu kwesamende ukhangele phansi njalo uvuza igazi emakhaleni. Intatheli ikhulume lobambele isikhulumi samapholisa esabelweni seMatabeleland South uInspector Stanford Mguni ovumileyo ukuthi udaba olunje lufikile ezandleni zabo njalo basaluphenyisisa.
“Sithole umbiko mayelana ngecala lokubulala, njalo sesibophe abasolwa abahlanu futhi sisaqhubeka ngokuludingisisa.
“Phakathi kwabasolwa laba kulamadoda amane lowesifazana oyedwa. Bonke bavalelwe esitokisini futhi bazakuyathoniswa emthethwandaba ensukwini ezizayo,” kuphetha uInsp Mguni.
