Online Reporter
Brandon Moyo
UMichael Wallace wehlule uKelvin Muchenje, waba yintshantshu yeMzilikazi Classic Golf Tournament ka2025 eBulawayo Country Club.
Abadlali ababili beZimbabwe laba baqede bebambene ezingeni lika-216 ngemva kwezimbobo ezingu-54 zokudlala okuphoqe ukuthi kudlalwe i-play-off.
Leli bekulihlandla lesithathu leMzilikazi Classic njalo bekulabadlali abangu-79.
Ebuzwa ngokunqoba kwakhe, uWallace uthe:
“Ngithwale nzima ekuqaleni, kodwa ngibuye ngenza kuhle kuhlandla lesibili.
“Ngijabulile ngokunqoba. Ngike ngaba semidlalweni embalwa yama-play-offs, ngakho angizange ngibe lengcindezi, bengizama ukulingisa indlela engidlale ngayo phakathi kweviki,” kutsho uWallace.
Umongameli weZimbabwe Golf Association (ZGA) uBlessmore Gandawa uthe umqhudelwano ube yimpumelelo.
“Umqhudelwano uqhutshwe kuhle, konke kuhambe kuhle kakhulu. Ngitshayela ihlombe ikilabhu ngoba isilungiselele kuhle kakhulu.
“Ukuphuma kwabadlali abangu-79 akusinto encane. Ukuncintisana bekukuhle, kuboniswe umdlalo omuhle phakathi kukaMichael loKelvin,” kutsho uGandawa.
Umongameli weMatabeleland Golf Association uVusi Sinyoka uthe ujabule kakhulu.
“Umqhudelwano uqhutshwe kanye kanye lomgubho weNkosi uMzilikazi njalo kuyasijabulisa ukuthi umdlalo wethu ubuyingxenye yalokhu. Siyethemba ukuthi uzakhula ngoba impawu zalokhu zikhona. Sibonga bonke abasixhasileyo,” kutsho uSinyoka.
