Online Reporter
AMANINA eBudiriro 2, eHarare asehlalela evalweni nanko phela impahla yawo yangaphansi ike yahlala inyamalala osokubangele ukuthi amanye angene esikhathini kokuphela.
Impahla yangaphansi yamanina akulindawo engabonakaliyo kubikwa ingafika amatshumi amathathu njalo yayinyamalala ichayiwe.
Kubikwa kulomfana osakhulayo owabanjwa ezulazula emzini wabanikazi abantu bathi bembuza ukuthi udingani wehluleka ukuchasisa ukuba ubedingani egumeni labantu.
Umfana lo kubikwa waqala ukutshaywa ngabantu waze waveza ukuthi nguye owayetshontsha impahla yangaphansi yabomama njalo wayeyithatha ayeyigqibela esilugwini senkukhu.
UNkosikazi Nyasha Nyamayauta (32) ohlala kulelilokitshi uthi watshontshelwa impahla yakhe yangaphansi njalo usebulawa liqolo kanye lokungena esikhathini okungapheliyo.
“Ngangivela emsebenzini ebusuku ngahlangana lomfana ngambuza ukuthi udingani egumeni lethu wathi udinga abafana abalungisa amabhayisikili. Ngambamba ngasengibiza abantu yikho lapho avuma khona ukuthi nguye oweba amaphenti abomama. Wathi wayewathatha abesesiyazisuthisa ngawo esebenzisa izandla ngemva kwalokhu esule ngamaphenti lawo, angazi ukuthi kukhona yini omunye enza lokhu laye kumbe ukwenza eyedwa,” utsho njalo uNkkz Nyamayauta.
Uqhubekele phambili wathi: Amazwi alumfana sesihambe laye emapholiseni, athi wayekwenza lokhu ngoba efuna ukuzisuthisa emacansini, wathi wezwa ehawukela amaphenti la ayewasebenzisa ukuzihlikihla ngawo, uthi wakubona kunkundla zokuxhumana laye wasenakana ukuthi akwenze.”
UNkosikazi Anyway Kahiya Mutasa (26) uthe wacatshelwa zimpahla zangaphansi ezimbalwa ngosuku olulodwa ngesikhathi ezichayile.
“Ngathi sengiswele impahla yami yangaphansi, ngaqala ukugula ngibulawa liqolo kanye lesisu njalo ngingena esikhathini okungalamkhawulo. Amaphenti abomama abanengi ayecatshile acina etholakala kumfana lo kodwa awami angiwatholanga, angazi ukuthi awami wawasa ngaphi,” utsho njalo.
Umka Nkkz Mutasa (28), uthe lokhu kwamkhathaza kakhulu.
“Njengomuntu otshona esemsebenzini ngezwa unkosikazi esesithi utshontshelwe impahla yakhe yangaphansi ngesengisizwa njalo ukuthi kulomfana obanjiweyo okubikwa nguye owayetshontsha impahla leyi. Kuyisimanga ukuthi wayesenzani kahle kahle ngempahla yabomama le,” utsho njalo.
UNkosikazi Bettina Makoni (26), ohlala kulindawo, uthe wezwa umsindo ebusuku wasesizwa kuthiwa kulomfana otshaywa ngabantu kuthiwa utshontsha amaphenti abomama.
“Amanina alapha ahlala elahlekelwa yimpahla yangaphansi ichayiwe abantu babezibuza ukuba inyamalala njani.
Umfana lo wabanjwa wasevuma ukuthi nguye owayethatha amaphenti la. Uthi amanye wayewajikela emigelweni athathwe ngamanzi amanye awagqibele phakathi kwesilugu senkukhu,” utsho njalo uNkkz Makoni.
Umfana lo owavuma ukuthi nguye owayetshontsha impahla le kubikwa ukuthi ufunda uFomu 3 kwesinye isikolo esiseduzane.
“Umfana lo wafelwa ngunina ulobaba kuphela njalo uhlala lomama omncane. Abantu laba bathutha ngemva kwesehlakalo lesi. Umntwana lo ngangimbona engena esilugwini kakhulu esenza angani udlala lenkukhu asazi ukuba inkukhu lezi lazo azihlukunyezwanga pho,” kutsho uNkkz Makoni.
UNkosikazi Talent Pilo Magadzire (37) oyisakhamuzi salapho okwakuhlala imuli yalumfana uthe amanina abesehluphekile ngokutshontshelwa impahla yangaphakathi kunyanga ezedluleyo.
“Umfana lo asazi ukuthi uhlupho lwakhe ngolwani sibili. Mhla ebanjwa emzini wabantu, wacina esiya labo lapho ahlala khona waphuma esephethe amanye amaphethi la,” utsho njalo Magadzire.
Uthe umfana lo wathathwa wasiwa emapholiseni kodwa bafika bamekela wabuyela ngekhaya ngenxa yeminyaka yakhe yokuzalwa.
Amanina la athi adinga ongabasiza ngodubo asebekhangelene lalo olokungena esikhathini kokuphela.
Isikhulumi samapholisa eHarare u-Inspector Luckmore Chakanza, uthe usadinga isikhathi sokuba alonde udaba lolu abesesitsho ukuthi utholeni ngalo. UProphet Elijah weMt Gilead uthe lokhu kulesintu phakathi njalo umfana lo kumele adingwe ukuze kubonakale ukuthi angamsizwa njani.
