adminMUKURU wemapurisa anoona nezvekurwiswa kwekuparwa kwemhosva, Deputy Commissioner-General Josephine Shambare, vanoti vari kushushikana zvikuru nehuwandu hwemhosva dziri kuparwa dzakaita sevanoba vakapakata zvombo nekubhinywa kwevanhukadzi.
Vachitaura kumapurisa aiita zvidzidzo zvekurwisa kuparwa kwemhosva kuMorris Depot, muHarare svondo rapera, Deputy Com-Gen Shambare vakati semapurisa, vakazvipira mukuita basa ravo nesimba mukuona kuti nhubu dzose dzasungwa uye kuti dzarangwa.
“Zvinosuwisa kuti dzimwe mhosva dzekupondana dzinobva mukunetsana apo vanhu vanenge vachinwa doro nekurwisana mudzimba. Dzimwe mhosva ndedze makororo ari kuba kumagaraji anotengesa mafuta edzimotokari,” vakadaro.
Vakarumbidza veruzhinji nekushanda kwavari kuita nemapurisa mukurwisa kuparwa kwemhosva.
“Takamboshanya kunzvimbo dzinosanganisira Zaka neMurehwa makore akadarika taona mhosva dzekubatwa kwevana chibharo dzanyanya tichivadzidzisa uye kuparwa kwemhosva idzi kwakabva kwadzikira,” vakadaro.
Vanoti dzimwe dzemhosva dziri kuparwa dzine chekuita nehuwori hwekuba mari.
“Chinhu chikuru semapurisa tinovimbisa kuti tiripo pakuchengetedza runyararo munyika kuti tizadzikise donzvo reZim-Asset zvichifambirana nedingindira regore ra2015 remapurisa rinoti, ‘ZRP nekuvandudza hwaro nemagariro akanaka anoita kuti upfumi hwenyika husimukire”.
Online Reporter