UMTHUNYWA

Kuqakathekile ukubiya amasimu lezivande

Ethel Ncube

IZIFUYO ezinengi ezinjenge nkomo, imbuzi, obabhemi kanye lokunye akuphili ngotshani bodwa kodwa kuyadla lezinye izilimo kungakho kuqakathekile ukuthi abalimi babiye amasimu abo.

Ekhuluma loMthunywa uMnumzana Philani Maphosa ongumlimi ubike ukuthi abalimi kumele bafake uthango emasimini kumbe ezivandeni ukuze bavalele izifuyo zingangeni.

“Kuqakathekile ukuthi amasimu kanye lezivande kubiyelwe ukuze izifuyo zingazincedi ngezilimo.

Izifuyo zingavele zingene zidle izilimo umlimi akuselabhizimusi kuye njalo umlimi sengalamba ngakho izilimo kumele zivalelwe,” kuchaza UMnu Maphosa.

Okunye njalo nxa umlimi ebiya amasimu kumele enze isiqiniseko sokuthi ubiye ngendlela eqondileyo njalo eqinileyo.

“Nxa ubiyela amasimu kumbe isivande kumele wenze isiqiniseko sokuthi kuqinile okokuthi izifuyo azingeni, abalemali sebengafaka ucingo ngoba yilo oluphephileyo,” kuchaza uMnu Maphosa.

Inengi labalimi uyathola bekhala ngokuthi izifuyo zingene emasimini abo kodwa kuyibo abayabe bevilapha ukubiyela amasimu abo.

“Uyathola umuntu ekhala inyembezi ethi izifuyo zingene emasimini kodwa nje lokhu kwenzeke ngenxa yokuvilapha ukubiyela amasimu akho. Lokhu yikho okumele umlimi akwenze nxa efuna ukuba lesivuno esihle,” kuphetha uMnu Maphosa.

Leave a Comment