adminCharity Moyo
INHLANGANISO ebona ngezempilakahle yezifuyo eye-Veterinary Services ikhuthaze abalimi ukuthi bahlabe inkomo zabo umuthi wokudoza ukuze zivikelwe kumikhuhlane evame ngesikhathi sebusika.
Ekhuluma lentatheli uDokotela wezifuyo esabelweni seMatabeleland North, uNdabezinhle Mkhwananzi uveze ukuthi kubalulekile ukuthi abalimi bahlabe izifuyo zabo umuthi lo ngoba uqakathekile kakhulu.
Uveze ukuthi ukudoza inkomo kuyanceda ikakhulu abalimi ababhekane lodubo lokusilela kwezifuyo.
Uqhubekele phambili esithi izifuyo nxa zingadozwa akula ndaba ukuthi zidlani kaziwasweli amandla.
“Ukudoza izifuyo kuqakatheke kakhulu ngoba izifuyo zibalamadlabuzane okudla, ziyadla iloba yini ukuze zenelise ukuphila.
“Kungakho umlimi wonke kahlabe izifuyo zakhe ukuze zincedakale edlaleni le ezibhekane layo,” kutsho uDkt Mkhwananzi.
Wengezelele wathi izifuyo ezidoziweyo akuvamanga ukuthi zicube ngoba ziba lamandla okuhamba umango omude zisiyadinga ukudla.
Uqhubekele phambili esithi umlimi wonke olezifuyo kuqakathekile ukuthi asebenze kakhulu labodokotela bezifuyo ukuze athole ulwazi olujulileyo ngezempilakahle yezifuyo.
“Ngikhuthaza wonke umlimi ukuthi ancedisane labe-veterinary eseduzane laye ukuze athole ulwazi ngokugcinwa kwezifuyo ikakhulu ngesikhathi sebusika.
“Izifuyo kazila kudla lamanzi okwaneleyo ngakho kuyadingeka ukuba abalimi bafundiswe ngokujulileyo ukuze bengalahlekelwa yizifuyo zabo,” kuphetha uDkt Mkhwananzi.
Online Reporter